१५ वडाया नेवाः मोर्चाया सम्मेलन क्वचाल

येँ (झीगु स्वनिगः)

राष्ट्रिय स्वाधीनता, शान्ति व जनसंविधान सुनिश्चित यायेनु, नेवाः राज्य हयेत निक्वःगु वडा सम्मेलन ताःलाकेनु धैगु मू नारा थ्वयेकाः एकीकृत नेवाः राष्ट्रिय मुक्ति मोर्चा १५ वडा समितिया निक्वःगु वडा सम्मेलन जगतसुन्दर ब्वनेकुथिइ म्हीग शुक्रवाः क्वचाल । सम्मेलनं धर्म महर्जनयात नायः ल्यःसें झिंस्वम्हेसिया वडा समिति नीस्वंगु खः । वडा समितिइ न्वकु अजय महर्जन व सुरेश श्रेष्ठ, छ्याञ्जे सुरेशमान श्रेष्ठ, ल्यू छ्याञ्जे राजु महर्जन, दाँभरि पुष्पगोपाल महर्जन, दुजलय् विष्णु महर्जन, सन्त महर्जन, कान्छा महर्जन, आशाकाजी महर्जन लिसें सम्मेलनं सल्लाहकारय् तीर्थ महर्जन व पन्ना शाहीयात ल्यःगु खः । वडा समितिया न्हापांगु मुँज्यां आःयात १५ वडा दुनेया झिगू त्वालय् नेवाः स्वायत्त राज्यया थीथी खँ प्रचार यायेगु व मोर्चाया त्वाः समिति नीस्वनेगु खँ न्ह्यःथंगु दु । वडा सम्मेलनय् मूपाहाँकथं मोर्चाया जिल्ला नायः भाजु उमेश स्थापित, बिशिष्ट पाहाँकथं मोर्चा केन्द्रीय समितिया छ्याञ्जे सुरेश श्रेष्ठ, विशेष पाहाँ कथं मोर्चा केन्द्रीय दुजः किरण शाही लिसें मोर्चाया जिल्ला दुजःपिं झायादीगु खः ।