शान्ति व संविधानया नितिं हस्तान्तरण

नायः प्रचण्ड

थौं झीगु देश छगू गम्भीर राजनीतिक मोडं न्ह्याःवनाच्वंगु दु । नेपालीजनतां आमूल परिवर्तनया माध्यमं न्हूगु नेपाः दयेकेगु आशा व विश्वासलिसे झिंदँया महान जनयुद्धव झिंगुन्हुया ऐतिहासिक जनआन्दोलनय् सक्रृय सहभागी जूगु खः । जनताया उगु त्याग व बलिदानया लिच्वःकथं नेपाःया २४० दँनिसे शासन याना वयाच्वंगु राजतन्त्रया अन्त्य जुयाः गणतन्त्रया पलिस्था जूगु खः । थुगु लसताय् थःगु प्राणया आहुति ब्यूपिं शहीदपिं प्रति भावपूर्ण श्रद्धाञ्जली देछासे, वेपत्ता परिवारं व अपाङ्गपिंप्रति हार्दिक सम्मान देछाया । थौं नेपाली जनता राजतन्त्रयात वांछ्वयाः गुगु उपलब्धी वल उकी छिकपिनिगु तःधंगु भूमिका दु । क्रान्तिकारी आन्दोलनय् गुगुकथं महत्वपूर्ण भूमिका म्हितादिल । विगत प्यदँनिसे न्ह्यानाच्वंगु शान्ति प्रकृयाय् नं छिकपिसं उलिहे धैर्य, साहस व अनुशासन सहित जिम्मेवारी पूवंकादिल । थौंया राजनीतिक अवस्था अन्तिम चरणय् थ्यंगु दु । शान्ति सम्झौता व अन्तरिम संविाधनया व्यवस्थाकथं समायोजन व पुनस्र्थापनाकथं निगू सेनाया स्थिति दु । झीसं समायोजन व पुनस्र्थापना यानाः न्ह्याकेत स्वयाच्वनागु दु ।
थ्व राष्ट्रया ऐतिहासिक आवश्यक खः । थ्व उदेश्ययात पूवंकेगु नितिं जिमिसं सेना समायोजन व पुनस्र्थापनाया ज्यायात न्ह्यःने यंकाच्वनागु दु । थुगु प्रकृयायात अन्तराष्ट्रिय समर्थन सहित सहजरुपं न्ह्यःने यंकेत सार्थक लिच्वः पिकायेगु नितिं जिमिसं राजनीतिक सहमतिं न्यागू बुंदे संयुक्त पत्र छ्वयाः सयुक्त राष्ट्रसंघं संयुक्त राष्ट्र संघीय मिशन छ्वया हयेत इनाप याना । तर गुगु ज्या पूवंकेत अनमिनयात जिमिसं गुगु ज्या याकेत इनाप यानागु खः, वज्या पूमवंक छुं न्हि न्हयः जक अनमिन लिहांवनीगु ज्या जुल । थुकिं निश्चितरुपं आशंका व समस्या पिकागु खनेदु ।

शान्ति प्रकृयायात थासय् थ्यंकेत प्रतिबद्ध दु । थ्वहे कारणं सरकारपाखे न्हूगु सहमति सहित थौं थ्व मुँज्यातक्क वयागु दु । शान्ति प्रकृयायात सार्थक निष्कर्षय् थ्यंकेगु व सवल राष्ट्रिय ुसुरक्षाया नितिं सेना समायोजन व पुनस्र्थापनायात सही ढंगं न्ह्यःने यंकेगु, संविधान सभां जन ओकांक्षाकथं न्हूगु संविधान दयेकाःन्हूगु नेपाःदयेकेगु चाहना पूवंकीगु खःला धकाः आशंकानं जनताया दु । नेपाःया इतिहासया दकले लिपांगु चरणय् संविधान सभाया आयोजनाया नितिं झीगु यक्कों हि व चःति बाहावने धुंकूगु दु । जनसंविधान दयेकेगु हे नितिं जिमिसं संविधानसभाया नितिं थुलि यक्को त्याग व वलिदान यानागु खः । संविधानसभां न्हूगु संविधान दयेकेगु झीगु पूर्ण प्रतिवद्धताप्रति जिपि दृढ दु । थुगुकथं शान्ति व संविधान दयेकेगुया नापं स्वाधिनताया रक्षाया ख्याच्वःनं झीगु न्ह्यःने दु । आम नेपाःमि जनता सच्चा देशभक्त व गणतन्त्रवादी शक्तितय्गु एकतां थुपिं दक्को हाथ्याया सामना यायेफै धयागु खँय् जिमिगु विश्वास दु । नेपाःया अन्तरिम संविधान २०६३ या धारा १४६ व धारा १४७, विस्तृत शान्ति सम्झौता २०६३ व हतियार व सेना व्यवस्थापन सम्झौता २०६३ प्रति प्रतिवद्ध जुयाः जिमिसं जनमुक्ति सेनायात विशेष समिति अन्तर्गत तयेत जिपिं तयार जुयागु खँ प्रष्ट हे दु ।

जिमिगु हे नेतृत्वय् गणतन्त्र नेपाःया न्हापांगु निर्वाचित सरकार दयेकूगुहे इलय् सामान्यत उगु घोषणा याःगु खः। परिवर्तित परिस्थितिइ उकियात व्यवहारिक रुप वीत थौं थ्व विशेष मुंज्याया ग्वसाः ग्वयागु दु । सेना समायोजन व पुनस्र्थापनाया यक्कों ज्या ल्यं हे दनि । नेपाःया फुक्क राजनीतिक दलत, आम नेपाली जनता, जनमुक्ति सेना, नेपाली सेना लगायत फुक्क सुरक्षा निकायत, सकसिगुं कुतलं व अन्तराष्ट्रिय समुदायया ग्वाहालिं उपयुक्त जिम्मेवारी पूवंकेगु खँय् जिपिं विश्वस्त दु । नेपाःया शान्ति प्रकृया व सेना समायोजन प्रकृयाय् ग्वाहालि जुइगु फुक्क राजनीतिक दलत फुक्क संघसंस्थात, संयुक्त राष्ट्र संघ अनमिन, मित्र देयत फुक्कसितं थुगु अवस्थाय दुनुगलं सुभाय् वी । शान्ति संविधान व सम्वृद्ध न्हूगु नेपाः निर्माणय झी सकसिगु चाहना पूवनेमा धकाः भिंतुना सहित थःगु बहचा हाकःगु नुगः खँ थन हे क्वचायेके सुभाय् । अभिवादन ।

More Stories Like this