माओवादीया नेतृत्वय् सहमतिया सम्भावना

म्हिगः निसें जनसेना सरकारया जिम्मेदारी अन्तर्गत विशेष समितिया मातहतय् वनीगु जुइवं माओवादीया नेतृत्वय् सरकार गठन प्रकृयायात कयाः छलफल यायेत नेपाली कांग्रेस व एमाले तयार जूगु दु । छन्हु न्ह्यः तक्क माओवादीया नेतृत्वयात अस्वीकार यानावयाच्वंगु कांग्रेस-एमालेया थुगु लचकता लिसें आः न्हूगु राजनीतिक सहमतीय वा वहुमतीय सरकार दयेकेत लँ चाःगु प्यख्यरं अनुभूति याःगु दु । संविधान सभाया दकले तःधंगु दल एकीकृत नेकपा -माओवादी)या नेतृत्वय् सरकार दयेकाः न्ह्याः वन धाःसा पेन्डिङ्गय् लानाच्वंगु यक्कों राजनीतिक गतिरोधत चीकेफैगु विश्वासया लकस सृजना जूवंगु खँयात अस्वीकार याये थाय् मदु । वंगु शुक्रवाः शान्ति मन्त्रालय् जूगु स्वंगू दलया वैठकय् नेपाली कांग्रेस व एमालें माओवादीया नेतृत्वप्रति सकारात्मक जुइवं थप छलफलया वातावरण तयार जूगु खः ।

सहमतिया सरकार गठनया नितिं राष्ट्रपति डा. रामवरण यादवं वियादीगु छवाःया अवधि वंगु शुक्रवाः कवचायेवं स्वंगू दलं लिखित पौ च्वयाः थप न्यान्हुया न्हि तनेत इनाप याःगु खः । आः वइगु बुधवाः तक्कया दुने माओवादीया नेतृत्वय् सरकार गठन यायेत छलफल जुइगु जूगु दु । थप अवधिकथं न्यान्हुया ई माग यायेगु प्रस्तावं कांग्रेस व एमाले न्ह्यःने हयेगु माओवादीं थःगु पार्टीया नेतृत्वय् सरकार गठन यायेगु वारे छलफल मयायेगु खःसा सहमतिया सरकारया खँल्हानाःई छ्यायेगु वाहेक मेगु छुं ल्हातय् मवइगु खँ न्ह्यःने तयेवं माओवादीया उगु खँ कांग्रेस-एमालेया मिखा चाःगु खः । थुयालिपा माओवादीया नेतृत्वयात नं थःपिसं स्वीकार याये फैगु बिचाः इमिसं प्वंकूगु खः । स्वंगू दलं न्यान्हुया अवधि थप याकेगु खँ क्वछीधुंकाः हालय् च्वंगु २८ दलया वैठकं उगु खँय् सहमति यायेवं पत्र ज्वनाः नेतात राष्ट्रपतिया थाय् वंगु खः । संसदीय व्यवस्था व लोकतन्त्रया न्हापांगु मान्यता धयागु हे माओवादीया नेतृत्वय् सरकार दयेके वीगु खः । कांग्रेस-एमालें थुगु यथार्थ खँयात स्वीकार यायेमफुगु कारणंहे देशय् न्हय्ला न्हय्ला तक्क प्रधानमन्त्री ल्यये मफयाः कामचलाउ सरकारं ज्या चलय् यायेमालाच्वंन । भारतया नाङ्गो हस्तक्षेप नं थुकिया मेगु कारण खः । थः अनुकूलया दलयात न्ह्यःने हयाः नेपाःया प्रधानमन्त्री दयेकेगु भारतया चाहना न्ह्यावलें अलेन्ह्याथासं लागूहे जुइ धयागु मदु । भारतया हस्तक्षेपयात यदि थनया संसदीय दलतय्सं विरोध यायेमफुसां म्होनिं साथ जक मविल धाःसां ब थःथम्हं छुं यायेफैगु अवस्था मदु ।
माओवादीया नेतृत्वय् सरकार दयेकल धाःसा भारतय् हस्तक्षेपयात सरकारी स्तरय् लिसालेफै । नेपाली कांग्रेस वा एमालेया नेतृत्वय् थ्व सम्भव मदु । नेपाःया राष्ट्रिय स्वाधिनताया धात्थेंम्ह रक्षक माओवादी थ्व बाहेक मेमेगु दलतय्गुपाखें सम्भव हे मदु । सरकारं यदि राष्ट्रिय स्वतन्त्रता व अखण्डता प्रति छगू जिम्मेवार शक्तिया रुपं न्ह्यःने यंकेगु खःसा माओवादीया नेतृत्वया सरकार प्रति मेमेगु दलतय्सं सहमति दयेकेहमाः ।

More Stories Like this