प्रचण्डनाप जनसेनाया लिपांगु अन्तक्रिर्या
एकीकृत माओवादीया नायः पुष्पकमल दाहाल प्रचण्डलिसे चितवनया शक्तिखोरया तेस्रो डिभिजनय् च्वंपिं माओवादीया जनसेनात नापं म्हिगः शनिवाः लिपांगु अन्तक्रिर्या ज्या जूगु दु । म्हिगः शनिवाःनिसें जनमुक्ति सेनात विशेष समिति मातहतय् हयेगु तयारीया झ्वलय् अन्तिम अन्तक्रिर्या ज्याझ्वः याःगु खः । उगु ज्याझ्वलय् जनमुक्ति सेेनातय्सं प्रचण्डयात शान्ति प्रक्रिया याकनं क्वचायेकेत इनाप यानादीगु खः । जनमुक्ति सेनातय्सं इलय् हे न्हूगु संविधान दयेकेगु ज्या क्वचायेकूगु स्वयेत थःपिं हथाय् चायाच्वनागु दु धयादिसें शन्तिप्रक्रिया व न्हूगु संविधान निर्माण यायेगु नितिं थःपिन्सं न्ह्याथेज्यागु ग्वहालि यायेत नं तयार दु धकाः धयादीगु खः ।
उगु अन्तक्रिर्या ज्याझ्वलय् माओवादीया जनसेनातय्सं थःपिनिगु ब्यागलं कथंया म्हसीका दयेमाः धकाः नं बहः बियादीगु खः । लडाकूतय्गु न्ह्यसःया लिसलय् प्रचण्डं शान्ति व संविधान सुनिश्चित यायेत जनसेनाया ग्वहालि मदयेकं मगाः धकाः धयादीगु खः । शनिवाः सुथय् शिविरय् प्रचण्ड थ्यनेवं वय्कःयात जनसेनातय्सं स्वांमाः क्वखायेका लसकुस याःगु खः ।
