जनसेना औपचारिक रुपं सरकारया मातहत

प्रधानमन्त्री नेपाल व नायः प्रचण्डपाखें ल्हाःचिं

येँ (झीगु स्वनिगः)

१० दँया जनयुद्ध ल्वाःपिं माओवादीया जनमुक्ति सेना म्हिगः शनिवाःनिसेंं औपचारिक रुपं सरकारया मन्त्रिपरिषद् अन्तर्गतया प्रधानमन्त्री कजि जुयादीगु सेना समायोजन विशेष समितिया मातहतय् तःगु दु । जनमुक्ति सेना व हतियार लःल्हायेगु औपचारिक ज्याझ्वः म्हिगः शक्तिखोरया तेस्रो डिभिजनय् याःगु खः । उगु ज्याझ्वलय् प्रधानमन्त्री माधवकुमार नेपालं नेपाःया राष्ट्रिय ध्वाँय् व नेपाल व अध्यक्ष प्रचण्डं संयुक्त कथं बेलुन ब्वयेकेगु ज्या यानादीगु खः । अथेहे, जनसेनात विधिवत कथं मन्त्रिपरिषद् अन्तर्गतया विशेष समिति मातहतय् वल धकाः घोषणा याःगु खः । ज्याझ्वलय् जनवादी म्येया धुनय् जनसेनातय्सं परेड म्हितेगु ज्या याःगु खः । अन दक्ले न्हापां मंकाः कथं राष्ट्रिय म्ये तकं हालेगु ज्या जूगु खः ।

जनसेनातय्सं नेपाःया आदिवासी जनजातिया वसः पुनाः सांस्कृतिक ब्वज्या याःगु उगु विशेष समारोहया दबुलिइ दक्ले न्ह्यःनेया झ्वलय् प्रधानमन्त्री माधवकुमार नेपाल, सभामुख सुवासचन्द्र नेम्वाङ, एकीकृत माओवादीया नायः पुष्पकमल दाहाल प्रचण्ड, नेपाली कांग्रेसया सभापति सुशील कोइराला, एमालेया नायः झलनाथ खनाल, पुलांम्ह प्रधानमन्त्री शेरबहादुर देउवा, सूर्य बहादुर थापा, मन्त्रीत व विशेष समितिया दुजःपिं च्वनादीगु खः । माओवादीया सैन्य इञ्चार्ज बर्षमान पुन अनन्तं न्ह्याकादीगु ज्याझ्वलय् प्रधानसेनापति छत्रमानसिंह गुरुङ, नेपाल प्रहरीया प्रमुख रमेशचन्द्र ठकुरी, सशस्त्र प्रहरीया प्रमुख सनत बस्नेत व राष्ट्रिय अनुसन्धान विभाग प्रमुख अशोकदेव भट्ट, गृहसचिव गोविन्द कुसुम व रक्षा सचिव नविन घिमेरे नं आशन ग्रहण यानादीगु खः ।