कांग्रेस-एमालें अडान त्वःतल

सहमतीय सरकारया नितिं न्यान्हु म्याद थप यायेत स्वंगू दल तयार

येँ (सन्ध्या टाइम्स)/सहमतीय सरकार गठनया नितिं थौं सुथय् च्वंगु स्वंगू दलया शीर्ष नेतातय्गु बैठकय् नेपाली कांग्रेस व एमालें एकीकृत माओवादी नागरिक पार्टी मजुइकं माओवादीया नेतृत्वय् सरकार दयेकेगु स्वीकार्य जुइ मखु धयाच्वंगु पुलांगु अडान त्वःतूगु दु। सेना व ल्वाभः दुगु दलया नेतृत्वय् सरकार दयेकेगु स्वीकार याये मखु धयाच्वंगु अडान कांग्रेस व एमालें त्वःतेवं आः सहमतिया सरकार दयेके फइगु सम्भावना अप्वया वःगु दु। थौंया बैठक लिपा माओवादीया उपाध्यक्ष नारायणकाजी श्रेष्ठ प्रकाशं संचारकर्मीतलिसे खँल्हासें धयादिल, न्हापा कांग्रेस एमालें माओवादीया नेतृत्वय् सरकार दयेकेगु स्वीकार याये मखु धयाच्वंगु अडान त्वःताः आः स्वंगू दलया न्ह्याम्हेसिया हे नेतृत्वय् जूसां सरकार दयेकूसां स्वीकार याये धाःगु दु ।'

थौंया बैठकं सहमतीय सरकारया नितिं न्यान्हुया म्याद थप यायेगु नितिं राष्ट्रपतियात इनाप यायेगु निर्णय याःगु दु। राष्ट्रपतिं सहमतिया सरकार दयेकेत थौं शुक्रवाः तकया म्याद बियातःगु खः। राष्ट्रपतिं बियातःगु म्याद थौं १२ बजे फुइगु जुयाः थौं सुथय् हे स्वंगू दलया बैठक च्वनाः उगु निर्णय याःगु खः। थौंया बैठकय् एकीकृत माओवादीया अध्यक्ष प्रचण्ड, उपाध्यक्ष नारायणकाजी श्रेष्ठ प्रकाश, नेपाली कांग्रेसया सभापति सुशील कोइराला, बरिष्ठ नेता शेरबहादुर देउवा, संसदीय दलया नेता रामचन्द्र पौडेल, एमालेया अध्यक्ष झलनाथ खनाल, महासचिव ईश्वर पोखरेल, केपी शर्मा ओली, भरतमोहन अधिकारीपिं उपस्थित जुयादीगु खः ।

लडाकु हस्तान्तरणय् असन्तुष्टि
एकीकृत माओवादीया लडाकुतय्त विशेष समिति मातहतय् यंकेत चितवनया शक्तिखोरय् तयारी जुयाच्वंगु अवस्थाय् माओवादीया हे पोलिटब्यूरो दुजः देबेन्द्र पौडेल 'सुनिलं' धाःसा व ज्या जोखिमपूर्ण खः धकाः असन्तुष्टि प्वंकादीगु दु। वय्कलं थःगु फेसबुकय् चीहाकःगु च्वसु हे च्वयाः उज्वःगु असन्तुष्टि प्वंकादीगु खः। उगु च्वसुइ धयातःगु दु, 'छखे एनेकपा (माओवादी) आन्तरिक बहसय् दुगु इलय् मेखे सरकार गठन जुइ मफयाः अराजकता व अस्थिरता ब्वलनाच्वंगु इलय् जनमुक्ति सेनाया बारे थज्याःगु निर्णय यायेगु अवश्य नं जोखिम खः ।