माओवादी दुने ब्वलंगु आन्तरिक कचवं

दकलय् तःधंगु पार्टी माओवादी दुने अध्यक्ष पुष्पकमल दाहाल व उपाध्यक्ष डा. बाबुराम भट्टराई दथुया कचवं हानं छक्वः सतलय् थहां वःगु दु। तर आः जूगु कचवंया रुप धाःसा न्हापा लिपा थें सामान्य मजू। कचवंया कारणं माओवादीं तःन्हु न्ह्यवंनिसें तयारी यानाच्वंगु प्रशिक्षण ज्याझ्वः स्थगित यायेमाःगु अवस्था पिहां वःगु दुसा मेखे थःपिनि ख्वाःपौ 'जनादेश' या सम्पादकयात तकं हिले माःगु घटना जूवंगु दु। आकाझाकां विकास जुया वःगु थ्व घटनां गनं पार्टीयात दुर्घटनाय् लाका बीगु जकं मखु ला धइगु आशंका नं जूगु खः। देशय् शान्ति प्रक्रियायात ग्वाहालि यायेत वयाच्वंगु अनमिन लिहां वनेधुंकाः लडाकुया भविष्ययात कयाः चिन्ता जुयाच्वंगु, थ्वहे इलय् भारतं हानं नेपाली सेनायात ल्वाभः बीगु धकाः तयारी यानाच्वंगु, सरकार दयेके मफयाः मुक्कं देय् तरल अवस्थाय् लानाच्वंगु, संविधान जारी यायेमाःगु ई न्ह्यःने वयाच्वंगु आदि अनेक समस्यातय् दथुइ देय्या दकलय् तःधंगु राजनीतिक दल जक मखु शान्ति प्रक्रियाया छगू पक्ष जुयाच्वंगु माओवादी दुने थज्याःगु दुर्घटनाया सम्भावना ब्वलनीगु धाइगु धाथें नं बांलाःगु खँ मखु। यदि थ्व इलय् माओवादी दुने छुं नं कथंया दुर्घटना जुल धाःसा देशय् थुपिं फुक्क हे समस्यात छक्वलं न्ह्यःने वयाः अकल्पनीय अराजकता ब्वलनीगु खँयात सकस्यां वाःचायेकेमाः। माओवादी नेतृत्वं ला झन् हे वाःचायेकेमाः। उकिं वय्कःपिंसं मुलुकया संवेदनशीलतायात ध्यानय् तयाः थःपिनि व्यक्तिगत स्वार्थयात छखे तयाः न्ह्याः वनेगु अभ्यास यायेमाः। थुकिं मुलुक, जनता, पार्टी व स्वयम् नेतातय्त नं भिं याइगु खँ शायद लुमंका च्वनेमाली मखु जुइ ।

More Stories Like this