उत्तरी प्रस्ताव दक्षिणपाखें स्वीकार

उत्तर कोरिया (एपी)

उच्चस्तरिय वार्ताया नितिं उत्तर कोरियां याःगु प्रस्तावयात दक्षिण कोरियां स्वीकार याःगु दु । थ्व स्वयाः न्ह्यो उत्तर कोरियां दक्षिण कोरियानापं उच्चस्तरया सैन्य वार्ता यायेगु प्रस्ताव तःगु खः । वंगु छुं वाः न्ह्यो उत्तर कोरियां यानाः वयाच्वंगु वार्ताया प्रस्ताव दक्षिण कोरियां अस्वीकार यानाः वयाच्वंगु खः । वंगु लच्छि न्ह्यो उत्तर व दक्षिण कोरिया दथुइ युद्ध ब्वलनिगु संभावना अप्वेवं थीथी लागां च्यूताः प्वंकूगु खः । दक्षिण कोरियां पश्चिमा देय् नापं सहलह यानाः उत्तर कोरियां आणविक हतियार दयेकाच्वंगु द्वपं विया वयाच्वंगु खः । अथेहे, अमेरिकानापं सतिनाः दक्षिण कोरियां सिमा लागाय् सैनिक अभ्यास याःगु धासें आक्रोसित जुयाच्वंगु खः ।

चिनीया राष्ट्रपतिया अमेरिका भ्रमणपाखें बाराक ओबामा उत्साहित
अमेरिकी (एपी)

अमेरिकी राष्ट्रपति बाराक ओबामां चीन शान्तिपूर्ण ढंगं थःगु विकास निर्माणय् अग्रसर जूसा व अमेरिकाया नितिं नं लाभदायक जुइगु जानकारी ब्यूगु दु । चिनीयाँ राष्ट्रपति हु जिन्ताओलिसे नापलाये ज्या क्वचायेकेधुंकाः ग्वसाः ग्वःगु संयुक्त पत्रकार सम्मेलनय् ओबामां चीनया हरेक पलाः शान्तिपूर्ण जुइमाःगु जानकारी ब्यूगु खः । हु जिन्ताओया भ्रमणलिपा निगू देय्दथुइया स्वापू न्हूगु उचाईलय् थ्यंगु जानकारी ब्यूसें ओबामां निगू देय्या प्रगतिया नितिं थ्व भ्रमण कोशेढुंगा हे जूगु न्ह्यथंगु दु । अमेरिका व चीनदथुइया संयुक्त कुतलय् जक समृद्धि हासिल यायेफइगु ओबामाया दाबी दु । निगू पक्षीय वार्ताय् प्रष्ट जुयाः हे खँल्हाबल्हा जूगु ओबामां सञ्चारकःमिपिंत जानकारी ब्यूगु खः ।

More Stories Like this