चाँगुनारायणया कलश यात्रा लोप जुइगु खतरा

ख्वप (झीगु स्वनिगः)

ऐतिहासिक चाँगुनारायणया कलश यात्रा आर्थिक अभाव लिसे असुरक्षाया कारण वइगु दँनिसें मजुइगु सम्भावना अप्वःगु दु । तत्कालीन जुजु मानदेवया पालंनिसें ख्वपस्थित चाँगुनारायण देगः परिसरपाखें हलुमानध्वाखातक्क याइगु कलश यात्रा असुरक्षा लिसे आर्थिक अभावया कारण बन्द जुइगु अवस्थाय् थ्यंगु खः । नेपाःया हे दकले पुलांगु मानवनिर्मित धरोहर चाँगुनारायण व उकिया निर्माता मानदेवलिसे स्वानाच्वंगु छगू परम्पराया इतिहास हे क्वःचाइगु खतरा अप्वःगु स्थानीयबासीया नुगः खँ दु । पौष शुक्ल पक्ष व साउन शुक्ल पक्षय् चाँगुनारायण देगलंनिसें जमःतक्क जुइगु पन्चैबाजालिसेया कलश यात्रा नं औपचारिकताय् जक सिमित जुइगु यानाच्वंगु दु ।

थौंकन्हय् दमाहा व झ्याली थायेगु चलन जक दु । व नं चाँगुनारायण देगः परिसरय् जक सिमित जुइगु यानाच्वंगु दु । न्हापा न्हापा थः पुर्खां चाँगुनारायणनिसें जमःतक्क हे बाजा थायेगु याःसां नं आर्थिक अभावं उगु ज्या त्वःतूगु स्थानीय रामकृष्ण परियारं धयादिल ।