क्रान्तिकारीया देय्न्यंक संघर्ष अभियान

येँ (झीगु स्वनिगः)

शिक्षा क्षेत्रय् निजीकरण व व्यापारिकरण दिकेत अभियान न्ह्याकूगु अखिल क्रान्तिकारीं विहीवाः स्वनिगःया स्वंगुलिं जिल्लाया शिक्षा ज्याकुथिइ ज्ञापन पौ लःल्हाःगु दु । निजी शिक्षण संस्था दर्ता दिकेत माग यासें येँ, यल व ख्वपया जिल्ला शिक्षा ज्याकुथिइ क्रान्तिकारीं विहीवाः सुथय् ज्ञापन पौ लःल्हाःगु खः । पौ लःल्हाना कयादिसें येँ जिल्ला शिक्षा अधिकारी ज्ञानी यादवं क्रान्तिकारीया पलाः सकारात्मक जूगु धयादिसें थुकियात केन्द्रीय तहपाखें मन्त्रालयसं कुतः यायेत सुझाव बियादीगु दु । अथेहे यलया सहायक जिल्ला शिक्षा अधिकारी महेशप्रसाद शर्मां शिक्षा नियमावलीं दर्ता यायेगु अधिकार ब्यूगुलिं नियमावली हे परिवर्तन मयाःतले दिके मफइगु धयादीगु दु ।

छुं ई न्ह्यः क्वचाःगु केन्द्रीय समितिया निर्णयकथं देय्न्यंकया जिल्ला शिक्षा ज्याकुथिइ निजी शिक्षण संस्था दर्ता दिकेत ज्ञापन पौ लःल्हायेगु ज्याझ्वः दुगु क्रान्तिकारीं जानकारी ब्यूगु दु । उकियापाखें राज्यं सकारात्मक पलाः मन्ह्याकूसा निगूगु चरणय् आन्दोलनय् कुहांवयेगु अखिल क्रान्तिकारी केन्द्रीय ज्याकुथिं जानकारी ब्यूगु दु ।