दोलखाया निगू गामय् होमस्टे

दोलखा (झीगु स्वनिगः)

पर्यटन दँ २०११ यात ताःलाकेगु नितिं व पर्यटकतय्गु सुविधाया नितिं दोलखाया निगू गांयात होमस्टेया रुपं विकास यायेत्यंगु दु । ग्रामीण पर्यटन प्रबर्द्धन यायेगु नितिं जिरीया जिरेल बस्ती दुगु सिक्रि व झ्याकुया शेर्पा बस्ती दुगु सेराँकाप्तीयात होमस्टे दयेकेत्यंगु खः । जिरेल जातिया जक बसोबास दुगु सिक्रियात होमस्टे दयेकेगु नितिं जिरी उच्च माविया प्राचार्य टेकबहादुर जिरेलया संयोजकत्वय् छगू समिति नीस्वने धुंकूगु दु । उगु समितिं थुगु गांयात होमस्टे दयेकेगु नितिं पूर्वाधार तयार यायेत, पर्यटकतय्गु नितिं होमस्टे तयार यायेत वातावरण तयार यायेत लगायतया जिम्मेवारी क्वःछिनातःगु दु । सगरमाथाया प्रवेशमार्गया रुपं म्हसीका दुगु थाय् जिरीइ पर्यटकतय्गु आगमण अप्वयाः वयेवं जिरी बजारय् दुगु होटलतय्सं पर्यटकतय्गु चाप फयेमफइगु व गांबासीतय्त नं व्यवसायी दयेकेगु नितिं थ्व अवधारणा हःगु दोलखा उद्योग वाणिज्य संघया नायः भाजु रामेश्वर मानन्धरं जानकारी बियादीगु खः । होमस्टे दयेकेगु नितिं सतक, त्वनेगु लः, छगू हे धर्म संस्कृति दुगु नापं मिलय् जूगु बस्तीयात कायेगु यानाच्वंगु दु, नायः भाजु मानन्धरं धयादिल ।

मिलय् जूगु गां लोपोन्मुख जातिया बारे अध्ययनया नितिं अःपुइगु जूगुलिं नं जिरेल बस्ती रोजाइलय् लाःगु खः । सिक्रिइ होमस्टेया नितिं थीथी पुचलं स्थलगत अध्ययन नं यायेधुंकूगु दु । पाहुनातय्त घरायसी वातावरणय् च्वनेगु नितिं छखा छेँय् प्यम्ह मनूतक्क च्वनेजिइक सिक्रिया नीन्याखा छेँय् होमस्टे दयेकेगु योजना दयेकूगु जिरी उद्योग वाणिज्य संघया नायः भाजु भूमिराज खर्कां जानकारी बियादीगु खः । स्वीजरल्याण्डया जुरिच शहरया रुपं जिरीयात म्हसीकेगु याः । सगरमाथा आरोहणय् वनीपिं व सगरमाथा क्षेत्रय् वनीपिं पैदल यात्रीत जिरी जुयाः वनेगु यानाच्वंगु दु । ईलाका प्रहरी ज्याकू जिरीया तथ्यांङ्क कथं सन् २००९ स्वयाः नं सन् २०१० य् झिंन्यागू प्रतिशत स्वयाः अप्वः विदेशी पर्यटकतय्सं भ्रमण याःगु दु । विशेष गरी विदेशी पर्यटकत रोल्वालिङ क्षेत्र चाःहिलेत सिंगटी जुयाः वनेगु यानाच्वंगु दु । झ्याकु गाविसं नं घना जंगलया दथुइ दुगु सेराकाप्तीया शेर्पा बस्तीयात होमस्टे दयेकीगु जूगु दु । जिरी व सिंगटीया चिहाकःगु पैदल मार्गयारुपं दुगु थ्व मार्ग न्हापाया इलय् तसकं अप्वः चलय् जूसां नं झिदँया अन्तर्कालनिसें म्हो जक चलय् जूगु कारण उकियात सुचारु यायेत होमस्टे दयेकेत्यंगु गाविस छ्याञ्जे राजेन्द्र सुवेदीं जानकारी बियादीगु खः । उगु गांयात होमस्टे दयेकेगु नितिं थुगुसीया गां परिषद्पाखें न्यय्द्वः तका धेबा नापं विनियोजन यायेधुंकूगु दु ।

पर्यटकतय्सं सास्ती फयाः वयाच्वंगुलिं थनं होमस्टे पाहुना छेँ दयेकेत्यंगु खः । होमस्टें स्थानीयबासीया आय आर्जनय् नं वृद्धि जुइगु व पर्यटकतय्सं नं बांलाःगु सुविधा दइगु जूगुलिं थुकिइ थःपिं न्ह्यज्याःगु वय्कलं धयादिल । चेर्दङ व हनुमन्तेपाखें रोल्वालिङ क्षेत्रया हिमालत व दोलखा व रामेछापया आपालं गांत खनेदुगु व चेर्दङ महादेवया दर्शन याःसा मनोकांक्षा पूरा जुइगु धार्मिक विश्वास नापं दुगु वय्कलं धयादिल । होमस्टे दयेकेत सतक व मतया सुविधा दयेमाःगु जूगुलिं थुगु हे दँ थनं सतक थ्यंकेत गाविसं बजेट विनियोजन याःगु दुसा स्थानीयबासी खुसिइ दुगु लः घट्टयात सुधार यानाः मत उत्पादन यायेगु कथं ज्या जुयाच्वंगु नापं वय्कलं जानकारी बियादीगु दु । सेराकाप्तीइ शेर्पातय्गु जक नीस्वखा धइथे छेँत दु । सिन्धुपाल्चोकया बार्‍हबिसे जुयाः विगू गुर्बा थ्यंकाः सिंगटी कुहां वयाः जिरी थ्यंकीपिं पर्यटकत आपालं दु । सिंगटीपाखें जिरी थ्यंकेत दथुइ झाँकुइ च्वनीगु सुविधा मदयाः मेमेगु ताःहाकःगु लँपु छ्यलेमाःगु झन्झट मलायेमाः धकाः नं थुकियात होमस्टेया रुपं विकास यायेमाःगु वय्कलं धयादिल । सिंगटीपाखें जिरी वनीगु थ्व दकले चिहाकःगु लँ दुगु वय्कलं दाबी यानादिल । होमस्टे दयेकेत्यंगु निगुलिं गांतय्गु सरसफाइ, छेँय् रंग छिइगु, साँस्कृतिक ज्याझ्वः लगायतया तयारी जुयाच्वंगु दु ।

More Stories Like this