लच्छि तक छेँय् छेँय् बाखं कनीगु स्वस्थानी बाखं

मूस्याः ज्यापु

दँय् दसं माघ महिनापाखे लच्छि तक तिथि कथं स्वस्थानी बाखं सफू छेँय् छेँय् दुपिं नेवाःतय्सं बहनी बहनी स्वस्थानी बाखं कनेगु यानाच्वंगु दु । मिलापुन्हि खुन्हुंनिसें सिपुन्हि तक कनीगु स्वस्थानि बाखं दक्ले कुमारं अगष्ट मुनियात कनाच्वंगु बाखं खः धकाः सफुतिइ न्ह्यथनातःगु दु । बाखनय् महाद्यः, पार्वती, दक्षप्रजापति, गोमय्जु, सतिदेवी, गणेद्यः, कुमार, नवराज नापं मेमेपिनिगु ब्याख्या यानातःगु दु ।
विशेष यानाः उगु बाखय् महाद्यःया परिवार वं महाद्यःया गुणगान यायेगु नापं हिन्दू दर्शन कथं आदर्शवादी सिद्धान्तयात स्पष्ट रुपं हे नालातःगु खने दु । उगु बाखनय् स्वस्थानी व्रत च्वनीगु धकाः नं उल्लेख यानातःगु दु ।

बाखं कथं स्वस्थानी अपसं च्वनेगु धकाः थौंकन्हय् तकं येँया सक्वय् च्वंगु शाली नदिइ अथे अपसं अर्थात ब्रत च्वनेगु यानाच्वंगु दु । अन ब्रत च्वनीगु धैगु माधवनारायण नापं ब्रत च्वनेगु धकाः नं धायेगु याः । स्वस्थानी अपसं सक्वय् लच्छि तक च्वन धाःसा काय् बुइ धैगु आः तक नं मनूतय्सं विश्वास यानाः वयाच्वंगु दु । स्वस्थानीया बाखं कनीगु ज्वःछि माधव नारायणया जयजयकार यायेगु तकं धार्मिक मनूतय्सं यानाः वयाच्वंगु दु । स्व धैगु थः स्थानीय थाय् थःगु थाय् नाप स्वाकाः कनातःगु बाखं जुया हे सायद् स्वस्थानी बाखं धाःगु खयेमाः धकाः अःपुक अनुमान यायेछिं । बाखनय् स्वनिगःया थीथी लागाया शक्तिपीठत उत्पती जूगु धकाः गुहेश्वरींनिसें जालन्धरतक नं न्ह्यथनातःगु दु । उकिं हे उज्वःगु शक्तिपीठय् तकं थ्व इलय् भक्तजनत वनेगु यानाच्वंगु दु । स्वस्थानी बाखं कनीगु इलय् नेवाःतय्सं बाखंपाः तयाः बाखं कनेगु अले बाखं क्वचाये धुनेवं बाखंपाः इनाः नकेगु नं चलन यानाः वयाच्वंगु दु ।

स्वस्थानी बाखनय् महाद्यः नाप स्वापू दुगु थीथी घटनाक्रम नाप नापं भमचा चन्द्रवातीयात दुलिइ तयाः कुबिया हयाच्वंगु इलय् येँया सक्वया खुसिइ कुतुंवनाः लः हे तक्क दिउगु कारणं अनया भाषं लःयात नाः धाइगु जुया नाः दिउगु खुसिया नामं हे नाःदि खुसि धकाः धाःगु खः धकाः स्थानीय मनूतय्सं धयाच्वंगु दु । व हे नाःदि खुसियात थौंकन्हय् शाली नदी धकाः धयाच्वंगु दु । व हे शाली नदीइ थौंकन्हय् स्वस्थानी बाखं नाप स्वापू दुगु अपसं च्वनीपिं मनूत म्हो मजू । विशेषयानाः मिसापिं अपसं च्वनेगु यानाच्वंगु दु । स्वस्थानी बाखं धैगु गुलिसिनं थःगु थाय् नाप स्वापू दुगु बाखं जुयाः स्वस्थानी बाखं धाःगु खः धयाच्वंगु दुसा गुलिसिनं पार्वतीयात हे स्वस्थानी अले गुलिसिनं महाद्यःयात हे स्वस्थानी धकाः धायेगु यानाच्वंगु दु । थ्व हे झ्वलय् नेवाः संस्कृतिविद बलदेव जुजुं धाःसा स्वस्थानी धाःगु महामाही शक्तिया रुप खः धकाः धयादीगु दु । स्वस्थानी धैगु प्रकृति खः धकाः दावी यानादीम्ह बलदेव जुजुं स्वस्थानी बाखनं बाबांलाःगु सन्देश नं बियाच्वंगु दु अले उगु सन्देशयात थुइकेमाः धकाः धयादीगु दु ।
न्ह्यागु जूसां थौंया इलय् तकं आधुनिक नेवाःतय्सं छेँय् छेँय् कनाः वयाच्वंगु स्वस्थानी बाखंया अध्ययन यानाः उकिं वर्तमान अवस्थाय् समाजय् छु गुज्वःगु लिच्वः लाकाच्वंगु दु धकाः थुइका रोकारवालातय्त नं कनेमाःगु थौंया आवश्यकता खः ।

More Stories Like this