भारतीय विदेश सचिव छाय् नेपाः वल ?

गवले गवले नेपालय् राजनीतिक हिउपाः वइ, अवले अवल भारतीय सरकारं वा प्रतिनिधि नेपाः छ्वयाहयाः म्वाः मदुगु सल्लाह सुझाव जक मखु, कुटनीतिक मर्यादायात वास्तामयासे प्रतक्ष निर्देशन व दवाव वीगु ज्या यानावयाच्वंगु दु । व्यवस्थापिका संसदय् प्रधानमन्त्री ल्यज्याया प्रकृया न्ह्यानाच्वंवलय् नं माओवादीया पक्षय् मधेसवादीत कुहां वयेवं भारतीय प्रधानमन्त्री डा. मनमोहन सिंहया विशेष दूत श्यामशरणयात नेपाः छ्वया हयाः माओवादीयात भोट मविइत कडा चेतावनी बियाथकूगु खः । थौं हानं व्यवस्थापिका संसदय् प्रधानमन्त्रीया ल्यज्या जुइत्यंगु इलय् भारतीय विदेश सचिव निरुपमा रावया आगमनं छुं गुगु घटनायात उखेथुखे याइगु खः धायेकूगु स्थिति मदु । भारतीय विदेश सचिव रावनं नेपाःवयागु कारण छु खः स्पष्ट याःगु मदुनिसां छंु भिंगु उदेश्यं वःगु धकाः ला धायेफैगु स्थिति मदु । नेपाः वःगु मंगलवाः निसें थौं तक्कया दुने माओवादी, नेपाली कांग्रेस व एमालेया शीर्ष नेतात वाहेक राष्ट्रपति, प्रधानमन्त्री, लगायत व्यक्तिपिं नाप नं सहलह व्याके धुंकूगु दु । नेपाःया वर्तमान राजनीतिक गतिरोध व विकास सम्वन्धी खँया जानकारी कायेगु वाहेक सुपुर्दगी सन्धिइ हस्ताक्षर यायेगु खँयात नं ल्होंगु स्वयेवलय् विदेश सचिवया नेपाः वःगुया उदेश्य भारतया स्वार्थ अनुकुलया प्रधानमन्त्री ल्यज्याय् ग्वाहालि यायेगु व सुपुर्दगी सन्धिइ नेपाःया ल्हाःचिं तयेकेगु खः ।

भारतं ताःई निसें सुपुर्दगी सन्धिइ नेपाःपाखे हस्ताक्षर याकेत स्वयाच्वंगु खः । सुपुर्दगी सन्धिया प्रारम्भिक प्रतिलिपिइ पूर्व गृहमन्त्री कृष्णप्रसाद सिटौलां ल्हाःचिं नापं तये धुंकूगु दु । फाइनल प्रतिइ ल्हाःचिं तयेत्यंगु इलय् माओवादीया विरोधया कारणं अन्तिम प्रतिइ हस्ताक्षर जूगु मदुनि । माओवादीया विरोधया कारण अन्तिम हस्ताक्षर मजूनिगु उगु सन्धिइ भारत सरकारं भावि सरकार वयेन्हय् हे कामचलाउ सरकारया ल्हातंसां सन्धिइ हस्ताक्षर याकेत स्वयाच्वंगु दु । यदि उगु सन्धिइ सरकारं हस्ताक्षर यातहे धाःसां उकिया प्रयोजनय् समस्या वयेफूगु खँय् भारतं ध्यान मव्यूगु खनेदु । छगूला कामचलाउ सरकारं हस्ताक्षर हे यात धाःसां व भावी सरकार छुंनं इलय् उगु खँ खारेज यायेफुसा, दूरगामी प्रभाह त्वःतीगु उगु सन्धि नेपाः विरुद्ध दुगुलिं व्यवहारत लागू मजुइगु सम्भावना नं यक्को दु । तर भारतं कामचलाउ सरकारपाखें हस्ताक्षर याकाः जवरजस्ती कार्यान्वयनय् यंकेगु स्वःगु जूसां थ्व अन्तत लागू यायेफैगु स्थिति मदु । थ्व वाहेक भारतं चाहे जूगु छतानिता ज्या नं रावया भ्रमणं सरकारयात दवाव बीगु खनेदु ।
भारतीय विदेश सचिव रावयात नेपाः छ्वया हयाः भारतं चाहेेजूम्ह व्यक्ति प्रधानमन्त्री दयेकेगु ज्याय् पनाः थनाः म्होनिं भारतया दलाल मजुइम्ह व्यक्तियात प्रधानमन्त्री दयेकेफत धाःसा भारतया दवाव व हस्तक्षेपयात छुं म्हो यायेत नेपाःमि जनता ताःलाइ । नेपाःयात भारतया ल्हातं मुक्त यायेत थ्व छगू शुरुवात माध्यम नं जुइफु ।

More Stories Like this