देय् स्यंकल धकाः पुलांम्ह कार्यकर्तां न्यतालय् दाल

येँ (झीगु स्वनिगः)

थौंकन्हय् देय् अनिर्णयया बन्दी जुयाच्वंगुलिं राजनीतिक दलया कार्यकर्तात गुगु कथं तंचायाच्वंगु दु धकाः एमालेया पुलांम्ह छम्ह कार्यकर्तां व्यवहारय् हे वयाः क्यनाब्यूगु दु । नेकपा -एमाले)या नायः झलनाथ खनालयात थःगु हे पार्टीया पुलांम्ह छम्ह कार्यकर्तां देय् स्यंकल धकाः द्वपंबियाः न्यतालय् दाःगु दु । देय् बवार्द अवस्थाय् थ्यंकल धकाः कार्यकार्तं हे नेतायात न्यतालय् दाःगु घटना म्हिगः विहिवाः जक जूगु खः । स्वलाया संगठन सुद्धढीकरण, व्यवस्थापन व संचालनया ज्याझ्वः उलेज्या यायेगु नितिं सुनसरीया इटहरीइ थ्यंम्ह नेता खनालयात अथे एमालेया कार्यकर्तां खनालयात दाःगु खः । सलंसःम्ह कार्यकर्ताया दथुइ हे नेता खनाल छगू बैचारिक नापं संगठनात्मक ज्याभmवलय् ब्वति कायेत अन वंगु इलय् संविधानसभाया चुनाव तक नं एमाले हे सक्रिय कार्यकर्ता जुयाः ज्या यानादीम्ह देवीप्रसाद रेग्मीं छथु अथे न्यतालय् दाःगु खः । देय्यात बर्बादपाखे यंकाच्वंगु नापं न्ह्यःनेलाःपिं मनूतय्त पार्टीइ दुकाल धकाः एमालेया कार्यकर्ता रेग्मीं नेता खनालयात न्यतलय् दाःगु खः ।

उगु कथं नेतातया न्यतलय् दायेवं अन वयाच्वंपिं एमालेया मेमेपिं कार्यकर्तातय्सं रेग्मीयात आक्रमण याःगु खः । उगु घटनालिपा प्रहरीया हिरासतय् दुम्ह रेग्मीं संचारकर्मीतय्त धयादिल 'नेतां देश स्यंकल धकाः तंपिहां वल, अले न्यतालय् दाया ।' एमाले पार्टीइ दुहां वइपिन्त लसकुस यायेगु ज्याझ्वलय् अथे पार्टीइ दुहां वइपिनिगु हे लाइनय् च्वनाच्वंम्ह एमालेया पुलांम्ह कार्यकता धकाः सकलसिनं म्हस्यूम्ह रेग्मीं थःत तंपिहां वःगुलिं धकाः थःगु हे पार्टीया नायः खनालयात न्यतालय् दायागु खः धकाः धयादीगु धैगु व देय्प्रति चिन्तित जुयाः नेतायात ख्याच्वः बिउगु कथंया घटना खः ला कि नियोजित घटना खः धकाः सीके उलि अःपुगु धाःसा पक्कां हे मखु । एमाले दुने निगू गुट दयाच्वंगु वर्तमान अवस्थाय् संस्थापन पक्षधर अर्थात पार्टीया हे नायः खनालयात अथे कार्यकर्तां न्यतलय् दाःगु गनं पार्टीया मेगु गुट केपी शर्मा ओली पक्षधरया कार्यकर्तां जकं दाःगु मखुला धकाः न्ह्यसः ब्वलनीगु स्वाभाविक हे खः । यदि छगू गुटया डिजाइन कथंं अथे घटना जूगु खःसा उकिं एमाले दुने बांमलाःगु लिच्वः लाइ धैगु खँय् सुयां निगू मत दैमखु ।