'मधेसवादी दलयात समर्थन यायेत कांग्रेस तयार दु’
येँ (झीगु स्वनिगः)
नेपाली कांग्रेसया नेता गोपालमान श्रेष्ठं कांग्रेसया नेतृत्वय् सरकार दयेके मफत धःसा मधेसवादी दलतय्त थःपिन्सं समर्थन यायेगु जुइ धकाः धयादीगु दु । म्हिगः विहिवाः येँय् याःगु साक्षात्कार ज्याझ्वलय् न्वंवासें कांग्रेसया नेता श्रेष्ठं अथे धयादीगु खः । वय्कलं माओवादी व एमालें कांग्रेसया नेतृत्वयात स्वीकार मयात धाःसा कांग्रेस मधेसवादी दलतय्गु नेतृत्वय् सरकार दयेकेत ग्वहालि यायेत तयार धयादीगु दु ।
नेता श्रेष्ठं धयादिल 'म्हिगः मधेसीयात मुलुकया सर्वोच्च नागरिक राष्ट्रपति यायेगु ज्या नं कांग्रेसं हे याःगु खः ।
आः प्रधानमन्त्री मधेसीयात दयेकेगु ज्या नं यायेत कांग्रेस तयार दु । मधेसवादी दलया हे नेतृत्वय् सरकार दयेका जूसां मुलुकयात निकास बिइमाः ।' वय्कलं आःया अवस्थाय् स्वंगू दलं न्हूगु सरकार दयेके मफैगु अवस्था वल धाःसा नेपाःमि जनतात निराश जुइगु अवस्था वइ धयादिसें गुगु नं हालतय् सरकार दयेके हे माः धकाः बहः बियादिल ।
