सहमतिया सरकार दयेकेत कांग्रेसया कुतः

येँ (झीगु स्वनिगः)

झिंखुक्वः तक्क शर्मनाक हार जूम्ह नेपाली कांग्रेसया संसदीय दलया नेता रामचन्द्र पौडेलया विकल्प वीत नेपाली कांग्रेसं तयार जूगु दु । नेपाली कांग्रेसया नेतृत्वय् सहमतीय सरकार दयेकेत एकीकृत नेकपा (माओवादी) एमाले लगायत प्रमुख दलत नाप निणर्यक खँ ल्हायेत म्हिगः सिंहदरबारस्थित नेपाली कांग्रेसया संसदीय दलया ज्याकुथिइ च्वंगु शीर्ष नेतातय्गु वैठकं पहल यायेगु क्वछय्गु दु । प्रधानमन्त्रीया ल्यज्यायात कयाः एकीकृत माओवादी व एमालें न्ह्यब्वःगु प्रस्तावयात अस्वीकार यासे नेपाली कांग्रेसं न्हापांगु ल्यज्याय् दकले अप्वः वइगु निगू दलया उम्मेदवारया दथुइ जक निगूगु चरणया ल्यज्याय् ब्वति कायेदैगु धाःगु दु । दकले न्हापां सरकारया नेतृत्व माओवादीं याःगु उया लिपा एमालें याःगुलिं आः कांग्रेसयात सरकारया नेतृत्व वीमाःगु खँय् बहः विसे यदि माओवादी व एमालें कांग्रेसयात नेतृत्व याकेत तयार जुल धाःसा संसदीय दलया नेता जुया प्रधानमन्त्रीया उम्मेदवार जुयाच्वंम्ह रामचन्द्र पौडेलया विकल्प तकं वीगु संकेट व्यूगु दु । कांग्रेस दुने शेरवहादुर देउवां नं प्रधानमन्त्रीया उम्मेदवार वीगु खँ सार्वजनिक यायेवं उगु पार्टी दुने छम्ह जक उम्मेदवार क्वछीत संस्थापनपक्षयात नवजि न्ह्ययेथें जुयाच्वंगु दु ।

प्रधानमन्त्रीया ल्यज्याया नितिं आन्तरिक संविधानय् दुगु नियमावली संशोधन यायेगु खँय् नं नेपाली कांग्रेसं विश्वन्यंक न्ह्यानाच्वंगु प्रकृया व प्रचलनया आधारय् जक संशोधन यायेमाःगु धाःगु दु । उखे न्हापा छकः छ्यलाः असफल जूगु चुनाव प्रकृया आः हानं छाय् छ्यल धयागु खँय् राजनीतिक विश्लेषकपिसं न्ह्यसः थनाहःगु दु । आःया राजनीतिक अवरोधयात चीकेगु जूसा ३८/१ वा ३८/२ मखुसे ४१/२ पाखें न्ह्याः वनेमाःगु खः । २०५१ या नजिरयात न्ह्यःने तयेगु खःसा नं संविधान सभाय् दकले तःधंगु दल एकीकृत माओवादीयात सरकार गठन याकेगु मौका वियाः लच्छिया दुने संसदय् विश्वासया मत दुगु खँय् प्रमाणित याकेमाःगु खः । राष्ट्रपति डा. रामवरण यादवं व्यूगु अवधि थौं फुइत्यंगु दुसा ई थप याःसां नं थुखे पाखें छु प्रगति जुइगु खनेमदु । वैठकय् सभापति सुशिल कोइराला, महामन्त्री प्रकाशमान सिंह, वरिष्ठ नेता शेरवहादुर देउवा लगायत नेतापिसं ब्वति काःगु खः ।