ल्वाभः वइगु खँ क्वःछित

आःयात नेपालय् ल्वाभः दयेकेत माःगु ज्वलं निं वइगु

येँ (सन्ध्या टाइम्स)/भारतीय विदेश सचिव निरुपमा रावया नेपाः भ्रमण नापनापं भारतं नेपाः छ्वया महसे पना तःगु ल्वाभः आः नेपाः वइगु खँ नं निश्चित जूगु दु।
भारतीय विदेश सचिव रावलिसे जूगु भेटवार्ता लिपा नेपाःया गृहमन्त्री भिम रावलं थुकियात पुष्टि यानादीगु खँ भारतं पिहां वइगु अंग्रेजी न्हिपौ 'टाइम्स अफ इण्डिया'या अनलाइन संस्करणय् धयातःगु दु ।

आः भारतं वयेत्यंगु ल्वाभः तप्यंक भारतीय सरकारं छ्वया हयेत्यंगु धाःसा मखु। थ्व ल्वाभः नेपालं भारतया दकलय् तःधंगु ल्वाभः निर्माण याइगु संस्था हिन्दुजा ग्रुपया गल्फ आयल कर्पोरेशनपाखें न्याना कायेत्यंगु खः। तर ल्वाभः मीगु संस्था निजी खःसां भारत सरकारया अनुमति मदयेकं थ्व विदेशय् ल्वाभः निर्यात धाःसा याये मदु। आः नेपालं अनमिन लिहां वनेसातकि नेपाःया सेनाया इनाप कथं थ्व ल्वाभः छ्वया हयेत्यंगु खँ धाःगु दु। आः नेपालं हयेत्यंगु ल्वाभः तःधंगु व घातक मजुसे हेटौंडाय् च्वंगु ग्रिनेड फ्याक्टरीइ ग्रिनेड दयेकेत माःगु पीन व सुन्दरीजलया गोली फ्याक्टरीइ गोली दयेकेत माःगु गोलीया कप जक झिके यायेत्यंगु खँ धाःगु दु। सेनां थज्याःगु ल्वाभः खास यानाः थःपिनि तालिम सम्बन्धी ज्याया लागिं माःगु खः धकाः दावी यानाच्वंगु दु ।

उखे माओवादी अध्यक्ष प्रचण्डं म्हिगः प्रधानमन्त्री नापलानाः भारतं नेपालय् छ्वयाहयेत्यंगु ल्वाभः गज्याःगु खः धकाः न्यनेकने यानादीगु खँ सीदुगु दु। भारतपाखें न्हापा न्हापा नेपाःयात आपालं घातक ल्वाभः नं छ्वया हयाच्वंगु खः ।

रावया भ्रमण मुक्कं राजनीतिक
नेपाः भ्रमणय् वयाच्वंम्ह भारतीय विदेश सचिव निरुपमा रावया थ्व भ्रमण न्ह्याक्व हे सद्भाव भ्रमण जक खः धाःसां थुकिं धमाधम हे राजनीतिक मोड कया वनाच्वंगु खँ सीदुगु दु। मय्जु रावं नेपाःया फुक्क हे राजनीतिक पाटीया नेतात नापलाःगु जक मखु संविधानसभाय् दुपिं मधेशवादी पार्टीया नेतातय्त जक अलग्ग सःताः म्हिगः डिनर समेत यानादीगु कारणं वय्कःया थ्व भ्रमण नं विशेष सचिव श्यामशरणया भ्रमण थें हे जूवंगु खँ थन धया हःगु दु। विदेश श्याम शरणं नं न्हूम्ह प्रधानमन्त्री ल्ययेगु चुनाव जुइत्ययेकाः नेपाः भ्रमण यानादीगु खःसा वय्कलं नं मधेशवादी पार्टीत छथाय् तयाः तटस्थ च्वनेगु 'सुझाव' बियाथकूगु खः। अनमिन लिहां वनेसातकि राव नेपाः वःगुलिं नं थुकियात अर्थपूर्ण रुपं कयातःगु दु ।