संवैधानिक समिति सक्रिय यायेगु निर्णय

संविधान च्वयेगु ज्याय् वयाच्वंगु थीथी समस्यातय्त आः वैधानिक संवैधानिक समितिपाखें हे ज्यंका वनेगु खँय् २८ दल सहमत जूगु समाचार वःगु दु। थुकियात संविधान च्वयेगु ज्याय् वःगु छगू सकारात्मक संकेतया रुपय् कायेफु। संविधान च्वयेगु ज्याय् न्हापा थ्वहे समितिपाखें आपालं समस्यात समाधान याये मफयाः उकियात उच्चस्तरीय कार्यदल गठन यानाः अन छ्वयेगु ज्या याःगु खः। तर लिपा कार्यदलया म्याद थपे मजूगुलिं थ्व ज्या संविधानसभाय् दुथ्याःगु २८ दलया मंकाः बैठकयात बिलसा आः वहे २८ दलं थ्व ज्यायात संवैधानिक समिति मार्फत यायेगु धकाः निर्णय याःगु खः। खतुं थ्व कार्यदल व २८ दलया बैठक सिबें संवैधानिक समितिं हे यायेमाःगु ज्या खः। समितिं याये मफयाः जक थ्व ज्या उखेथुखे लाः वंगु खः ।

आः समस्या समाधानया लागिं संवैधानिक समितिया बैठक च्वनेबलय् उकिया प्रक्रिया धाःसा छुं भचा हीकेमाःगु जुया बी। गथे कि आः समितिया बैठक च्वनीबलय् उकिया दुजः जुयाच्वंपिं फुक्कं पार्टीया शीर्ष नेतात अनिवार्य रुपं उपस्थित याकेगु व्यवस्था जुइमाः। न्हापा न्हापा समितिया बैठक च्वनीबलय् उकी निर्णय यायेगु अधिकार मदुपिं सभासद्तय्त जक पार्टीं छ्वया हइगु खः। गुकिं यानाः बैठक न्ह्याबलें अनिर्णित जुयाः क्वचाः वनी। आः नं वहे पहः जुल धाःसा संवैधानिक समिति सक्रिय जूगुया अर्थ दइ मखु। यदि माल धाःसा समितियात ग्वाहालि याइगु मेगु उपसमिति दयेकाः नं ज्या याये जिउ। समितिं याइगु निर्णय आधिकारिक व वैधानिक जुइगु जूगुलिं थ्व मार्फत ज्या यायेगु पाय्छि खः ।

More Stories Like this