खोनाया ज्वजलपा

कृष्ण प्रजापति

नेपालय् हे न्हापांखुसी बिजुली मत च्याःगु व न्हापांखुसी कलहिति वःगु थाय् खोनाय् आः नकतिनि स्वन्हुयंकं खोना महोत्सव जुल। वंगु सनिवाः, आइतवाः व सोमवाः जूगु उगु महोत्सवया उलेज्या पर्यटन तथा नागरिक उड्डयन मन्त्री शरदसिंह भण्डारीं यानादीगु खः। खोना दुहां वनेगु मू लुखाय् स्वतँजाःगु पलिं चिनाः कलात्मक ध्वाखा दयेकाः पाहांपिंत लसकुस यानातःगु उगु महोत्सवया मू आकर्षण धइगु हे स्थानीय उत्पादन व कला संस्कृतिया तःजिगु न्ह्यब्वया खः। निखे कःनि घ्यय्यात गंकेत तयातइ थें यानाः थनातःगु लुखा जःखः ब्वयातःगुलिं थ्व बुँज्या याइपिनि बाहुल्यता दुगु थाय् खः धकाः क्यं। नापं उगु महोत्सव ज्यापु महागुथि खोना देय् समितिं ग्वसाः ग्वःगु जूगुलिं नं थन अप्वः धइथें ज्यापुलिसे सम्वन्धित लवःकवःत ब्वयातःगु खनेदु ।

निखे कतांमरियात हाकु पतासिं सिंकाः लसकुस यानातःगु ध्वाखां खोनाया नांजाःगु रुद्रायणी देगः तक वनेगु झ्वलय् थाय्थासय् परम्परागत चिकं दयेकाः मीगु यानाच्वंगु, बाजं पुचः वयाः लसकुस याः वयाच्वंगु लिसें थीथी कृषि उत्पादनया ज्वलं ब्वयातःगुलिं स्वकुमितय्त आकर्षित याये धुकी। मू बजाः दुहां वने न्ह्यः धाःसा पूर्वाधार तयार मजूगु खने दयेक हे लँ स्यंल्ह्वं याये ल्यं दनिगु, लः बाः वयाच्वंगु स्वये सफाईलय् ध्यान मतःगु खः ला धइगु आभास जुइ। खोना म्युजियम थ्यंकाः अन दुहां वनीपिंत महोत्सवया झ्वलय् सहुलियत टिकटया व्यवस्था यानातःगुलिं न्हापा लिपा स्वयां म्युनियमय् अप्वः हे हुलकुल खनेदु। नापसं लिधंसा मां पुचःपाखें बजि ल्हुयाच्वंगु नं प्रत्यक्ष क्यनातःगु दु ।

खोकना महिला जागरण मञ्चपाखें थाय् थासय् थःगु हे कथंया ब्यावसायिक बुँज्या, ब्यावसायिक कृषि सामग्रीया उत्पादन व परम्परागत नसा ज्वलं ब्वयातःगु दु। पाल्पाया करुवा व टोखाया चाकु धाःथें खोनाया चिकं देय्न्यंकं नां जाः। अन चिकं उत्पादन यानाच्वंगु प्रत्यक्ष ब्वयातःगु नापं प्याकेट यानाः मिया नं च्वंगु स्वयेबलय् खोनां चिकंया लागिं कमे याना तःगु नां अझं ल्यंकातःगु आभास जू। परम्परागत लाखे प्याखं महोत्सवया मेगु आकर्षण खः।
खोना महोत्सव उलेज्याया झ्वलय् मूपाहां व पाहांपिनि दथुइ न्ह्यब्वःगु लिधंसा पासा पुचःया भैरवकाली प्याखनं नं खोना कला संस्कृति व परम्पराय् गुलि च्वन्ह्याः धइगु क्यं। महोत्सवया हे झ्वलय् ख्वपया छ्वालिकला बिज्ञ लक्ष्मीप्रसाद ङाकुसीया खोना जात्रा पर्व सम्बन्धी एकल फोटो ब्वज्यां महोत्सवयात अझ झःझः धायेका बिउगु दु। जितापुर शहर कथं नं नांजाःगु थुगु खोना दुने दच्छियंकं जुइगु थीथी पर्व व सांस्कृतिक जात्रापर्वयात ङाकुसीं थःगु पीन्यापाः रंगीन फोटो मार्फत् न्ह्यब्वयातःगु दु ।

ज्यापुतय्गु बाहुल्यता दुगु खोनाय् जूगु खोना महोत्सवय् दच्छियंकं न्यायेकीगु नखःचखः, बुँज्या व कृषि सामग्रीया ब्वज्या यानातःगु दु। नापं यःमरि, घ्यःचाकु, छ्वय्ला, समय्बजि व भ्वय्ब्व तकं मीगु ज्या यानातःगु खः। अन क्यनीगु खः प्याखं, धाः प्याखं, देवी प्याखं आदिया लु नापं थीथी थासय् थीथी ज्या झ्वःत न्ह्यब्वयातःगुलिं नं ताःहाकः यानाः खोना देय् निचाः हे हिलेमाःथें यानाः रुट दयेकातःगु खः ।

खास यानाः महोत्सवया झ्वलय् अन ज्यापु महागुथि खोना देय् समितिपाखें नेवाः सांस्कृतिक स्थल दयेकेगु, ज्यापु संस्कृतिया रक्षाया लागिं ज्यापु पाठशाला दयेकेगु, गामय् छगू धर्मशाला व पार्क दयेकेगु, काष्ठकला उद्योगया विकास यायेगु, धलं वइगु फोहरयात मोहरय् हिलेगु, छेँयात हे पाहांपिं तयेगु गेष्ट हाउस कथं विकास यायेगु व खोनायात पर्यटन केन्द्र कथं विकास यायेगु ताः तयातःगु खः। उकिं हे महोत्सव जःछिं हे मनूत जिवन्त रुपं सुखू थायेगु, पिने च्वनाः बजां सालेगु व सुयां बजां त्वने मास्ते वःसा छक्वःया झितका कयाः होका चिलं बालं बीगु व्यवस्था नं याना तःगु खः ।

पर्यटन वर्ष २०११ या औपचारिक शुरुवात नापं न्हापांखुसी उलेज्या यानाः न्ह्याःगु थ्व खोना महोत्सवं छगू कथं मेमेगु महोत्सव याइपिंत स्यनेकथं खोना छगुलिं हे चाःहिलेगु यानाः फुक्कं हे थासय् महोत्सवमय यानातःगु बांलाःगु पक्ष खः ।

मोहनि हने मजिउगु थ्व देशय् खा, फा नं लही मजिउ धयातःगुलिं आः तक नं अन थज्याःपिं पशुपंक्षी लही मखुसा नेपाःया हे दकलय् तःधंगु नखः धाःगु मोहनि नं थन न्यायेकी मखु। खोनाया थ्व विशेषता पिनेयापिं मनूतय् रहस्यमय जू ।

मुक्कं देय्यात हे विकासपाखे न्ह्याकीगु थज्याःगु महोत्सव इलय् व्यलय् जुया हे च्वनेमाःगु बिचाः स्वकुमितय्सं प्वंकूगु खनेदु ।

More Stories Like this