संवैधानिक समिति सक्रिय यायेत दलतय्गु सहमति

आःयात २८ दलया बैठक स्थगित

येँ (सन्ध्या टाइम्स)/संविधानसभाय् दुथ्याःगु २८ दल संविधानसभाया संवैधानिक समितियात हे हानं सक्रिय यायेगु खँय् सहमत जूगु दु ।

थौं सुथय् सिंहदरवारय् च्वंगु २८ दलया बैठकय् न्हूगु संविधानय् च्वयेगु विवादास्पद विषयत ज्यंकेगु ज्या नं संवैधानिक समितियात हे बियाः उगु समितियात सक्रिय याना यंकेगु खँय् सहमत जूगु खः। म्हिगः तक संविधानय् च्वज्याय् वःगु विवादत ज्यंकेगु ज्या २८ दलया बैठकं याना वयाच्वंगु खःसा व स्वयां नं न्ह्यः थ्व ज्या माओवादी अध्यक्ष प्रचण्डया नेतृत्वय् गठित उच्चस्तरीय राजनीतिक कार्यदलं याना वयाच्वंगु खः। कार्यदल निष्क्रिय जुइधुंकाः थ्व २८ दलयात वःगु खःसा आः २८ दलं संवैधानिक समितियात हे याकेगु धकाः निर्णय याःगु खः। संवैधानिक समितियात ज्या जिम्मा बीगु निर्णयया नापनापं आः न्हिंन्हिं च्वनेगु यानाच्वंगु २८ दलया बैठक नं अनिश्चितकाल तकया लागिं स्थगित याना छ्वःगु दु ।

थौंया बैठकय् ब्वति कयादीम्ह माओवादीया उपाध्यक्ष नारायणकाजी श्रेष्ठ प्रकाशं आवंलि विवादित विषय ज्यंकेगु भाला नं संवैधानिक समितियात हे बीगु सहमति जूगुलिं संविधानसभाय् दुथ्याःगु २८ दलया बैठक च्वनेमालीगु अवस्था आः मंत, संवैधानिक समितिं हे उकिया नितिं ज्या याइगु जानकारी बियादिल।
२८ दलं संवैधानिक समितियात हे बैधानिक समिति धकाः सक्रिय यायेत्यंगुया कारण न्हूगु संविधान जारी यायेगु जेष्ठ १४ गतेया ई न्ह्यःने वयाच्वंगुलिं खः धाःगु दु ।


जनसेना हस्तान्तरणया ज्याझ्वः सरकार व माओवादीं इनाकाल
माओवादी लडाकुयात विशेष समिति मातहत हयेगु औपचारिक ज्याझ्वः माघ ८ गते यायेगु धकाः म्हिगः सरकार व माओवादी दथुइ जूगु सहमति कार्यान्वयन यायेगु नितिं सरकार व माओवादीं ब्यागलं ब्यागलं जिम्मेवारी कायेगु खँ क्वःछिउगु दु। सिंदरवारय् थौं सुथय् च्वंगु सेना समायोजन विशेष समितिया बैठकं जनसेना हस्तान्तरणया ज्याझ्वः माओवादीं यायेगु अले सरकारं ज्याझ्वःया व्यवस्थापन यायेगु भाला काःगु दु। बैठकं गृहमन्त्री भीम रावलया संयोजकत्वय् स्वम्हेसिया ज्याझ्वः व्यवस्थापन समिति नं गठन याःगु दु। उकी माओवादी नेता वर्षमान पुन अनन्त व कांग्रेस नेता रामशरण महत दुजः कथं च्वनादीगु दु। ज्याझ्वः शक्तिखोर शिविरय् जुइ ।