सहमति कायम याना वनेगु छगू अवसर

देशय् सकस्यां सहमति, सहमतिया राजनीति, सहमतिया सरकार धकाः तःथासय् धायेगु व न्ववायेगु यानाच्वंगु दु। तर उकिया लागिं कुतः धाःसा सुनां नं यानाच्वंगु खने मदु। थ्व हे झ्वलय् आः देय्या प्रधानमन्त्री ल्ययेगु सवालय् हानं छक्वः सहमतिया सरकार गठन यायेगु अवसर वयाच्वंगु दु। राष्ट्रपतिपाखें उकिया लागिं आहवान नं जुइधुंकूगु दु। तर देय्या नेतातय् पहः खनाः सर्वसाधारण जनतां आः हानं सहमतिया सरकार गठन जुइगु सम्भावना धाःसा खंकाच्वंगु मदु। थुकिं जनतायात निराश नं यानाच्वंगु दु। थज्याःगु अवस्थाय् राजनीतिक पार्टीतय्सं थवंथवय् मिले जुयाः सहमतिया सरकार दयेकाः क्यना बिल धाःसा उकिं संविधान दयेकेगु ज्यायात तकं बांलाःगु लिच्वः लाकीगु सम्भावना दया बी। आः दयेकीगु सहमतिया सरकार धइगु केवल सरकारया लागिं जक मखु, लिपा थ्यंकंया हे लँपु उकिं चायेका बी। राजनीतिक सहमति दयेकाः न्ह्याः वनेगु ज्याया आरम्भ विन्दु जुइफु आः दयेकीगु सहमतिया सरकार ।

छुं जुयाः राजनीतिक पार्टीतय्सं आः नं सहमतिया सरकार दयेकाः निराश जनताया ख्वालय् न्हिलासू बीगु ज्या याये मफुत धाःसा वयां लिपाया राजनीति याउँक न्ह्याइ धकाः आशा मयाःसां जी। लिसें जनतां नं राजनीतिक दल व उकिया नेतातय्त पूर्ण रुपं हे विश्वास यायेगु त्वःता हइ। उकिया लिच्वः संविधान निर्माण जक मखु कन्हय् मुलुक निर्माणय् तकं लाइगु खँयात वाःचायेकेमाः। सहमतिया निंतिं नेतातय्के त्यागया भावना दयेमाःगु आवश्यक दु। त्यागया भावना क्यनाः कायम जुयाच्वंगु अवरोधयात चीकाः न्ह्याः वनेगु थ्व अवसरयात राजनीतिक पार्टीतय्सं उपयोग यायेमाः ।

More Stories Like this