देउवायात प्रधानमन्त्री दयेकेगु : मन्त्री महत
येँ (झीगु स्वनिगः)
नेपाली कांग्रेसया केन्द्रीय दुजः नापं जुयाः च्वनादीम्ह उर्जामन्त्री प्रकाश शरण महतं वरिष्ठ नेता शेरबहादुर देउवा प्रधानमन्त्री जुइगु दाबी यानादीगु दु । संसदीय दलया नेता रामचन्द्र पौडेल झिंखुक्वःगु खुसिइ नं बूगु व एमाले - माओवादीं नं विश्वास यायेमफूगुलिं आः बरिष्ठ नेता देउवाया नेतृत्वय् सरकार दयेकेगु विषयसं पार्टीदुने सहलह न्ह्याःगु खँ न्ह्यथनादीगु खः । रिपोर्टर्स क्लबपाखें मंगलवाः ग्वसाः ग्वःगु साक्षात्कार ज्याझ्वलय् मन्त्री महतं देउवायात माओवादी व एमाले नं स्वीकार यायेफइगु दाबी यानादिल । फुक्कसित मिलय् यानाः यंकेफइगु जूगुलिं पार्टीदुने प्रधानमन्त्रीया उपयुक्त विकल्प देउवा हे जूगु नं महतया दाबी दु ।
आःया प्रधानमन्त्रीया उम्मेदवारय् पौडेल वा देउवा धइगुलिइ कांग्रेसदुने तःधंगु विवाद जुयाच्वंगु इलय् उर्जामन्त्री महतं माओवादी व एमालेयापाखें नं देउवाया पक्षय् गि्रन सिग्नल वयेधुंकूगु संकेत यानादिल ।
