जमलय् गोलीं कयाः निम्ह घाःपाः
राष्ट्रपति विरोधी आन्दोलन अझ तच्वयेकीगु
राष्ट्रपति डा. रामवरण यादवं प्रधान सेनापतियात पौ छ्वःगु असंवैधानिक धासें माओवादीया नेवाः राज्य समितिं थौं जमलय् पिकाःगु जुलुसय् प्रहरीं गोलीं कयेकूगु दु । उकी लानाः निम्ह प्रदर्शनकारी घाःपाः जूगु दु । जुलुसं नारायणहिति दरवार न्ह्यःने च्वंगु महेन्द्रया सालिकय् गयाः उकी ध्वाँय् ब्वयेकेगु कुतः यायेवं प्रहरीं हस्तक्षेप यानाः गोलीं कयेकूगु खः ।
प्रहरीं अन लाठीचार्ज यायेगु लिसें टियर ग्याँस नं कयेकूगु खः । प्रहरीया गोलीं कयाः रामेछापया केशव श्रेष्ठ व गोरखाया इश्वर ढकाल घाःपाः जूगु दु । उमित तुतिइ गोलीं लाःगु खः । निम्हेसितं वीर अस्पतालय् वासः याकातःगु दु । उमिगु स्थिति आः सामान्य जूगु खँ अस्पताल सूत्रं धाःगु दु ।
राष्ट्रपति यादवया पलाः असंवैधानिक जूगुलिं उकियात संशोधन यायेमाः धासें माओवादीया थीथी भातृ संगठनतय्सं आः येँ लगायत देय्या थीथी थासय् आन्दोलन न्ह्याकेगु ज्याझ्वः दयेकूगु दु । माओवादीं आः न्ह्याथे यानाः नं राष्ट्रपतियात पदच्युत यानां तुं त्वःतकेगु कथंया आन्दोलन न्ह्याकेगु तयारी यानाच्वंगु खँ सूत्रं धाःगु दु ।
राजीनामा बियाः वालुवाटारय् आराम यानाच्वंम्ह प्रधानमन्त्री प्रचण्डं थौंकन्हय् अन हे च्वनाः संघर्षया ज्याझ्वः दयेकाच्वंगु खँ सूत्रं धाःगु दु । वय्कलं म्हिगः व थौं नं संघर्षया ज्याझ्वलय् ब्वाँय् वनीपिं पार्टीया कार्यकर्तातय्त सःताः खँल्हा- बल्हा यानाच्वंगु खँ सीदुगु दु । माओवादीं आः सतक आन्दोलन यानाः हे राष्ट्रपति व कटवाल हटे यायेगु कुतः यानाच्वंगु खँ धाःगु दु ।
