सैनिक सामग्री दुत हइन

संयुक्त राष्ट्र संघीय मिसन अनमिनया वहिर्गमन लिपा विस्तृत शान्ति सम्झौता विपरित नेपाली सेनां सैनिक सामग्रीत दुत हयेत्यंगु दु । गोली, गि्रनेद लगायत दयेकेत छ्यलीगु बुलेट प्रुफ, डेटोनेटर, सेफ्ति पिन व विस्फोटक पदार्थ सेनां दुत हयेत्यंगु दु । माघ १ गते निसें अनमिन पिहांवंगु लगत्तै उगु सैनिक सामग्री छवाःनिसें झिन्हुया दुने वीरगंजया सीमा लागा रक्सौलय् थ्यनीगु धाःगु दु । च्वय् न्ह्यथनागु सैनिक सामग्रीत यक्कोहे न्ह्यःहे भारत सरकारयाके न्यायेगु खँ जूसां नं अनमिनया उपस्थितिइ सेनां दुत हयेगु हिम्मत याये मफुगु खः । अनमिन माघ १ गते निसें पिहां वनीगु पक्का पक्की जुइवंहे भारतया हैदरावादस्थित "गल्फ आएल कर्पोरेशन लिमिटेडयात उगु खँया सुचं व्यूगु खः । नेपाःया हिटौडाय् गि्रनेड दयेकेगु कारखाना दुसा सुन्दरीजलय् गोली दयेकेगु कारखाना दु । विस्तृत शान्ति सम्झौताकथं नेपाली सेना व जनसेना निगुलिं पक्षं ल्वाभः, गोलीगठ्ठा व विस्फोटक पदार्थ दुत हयेमदु, धकाः धयातःगु दु । निगुलिं पक्ष सेनाभर्ति मकायेगु, छगू पुचलं मेगु पुचःया विरुद्ध सैन्य हर्कत यायेमखु धकाः धया तःगु सम्झौताया ५.१.२ स न्ह्यथना तःगु दु ।

सेनाया थुगु पलाःयात न्ह्यःने यंकल धाःसा विस्तृत शान्ति सम्झौता भंग जूगु धायेगु लाकि मधायेगु ? अनमिनया वहिर्गमन लिपा सेनाया थुगु पलाःयात कयाः विशेष समितिं छु गुगुकथं काइगु खः धायेमफु । कामचलाउ सरकारं नं थुगु विषयलय् नवाये फैगु स्थिति मदु । सरकार अन्तर्गत धयातःसां नेपाली सेनां सरकार व विशेष समितियात टेरे याइगु तकं खनेमदु । सेनायात लोकतान्त्रिकरण यायेगु खँ नं अथ्य लानाच्वंगु दु । थुकियात कयाः सुनां पहल यानाच्वंगु नं मदु, सेना थःयात लोकतान्त्रिकरण यायेगु खँयात नं पूर्णत इन्कार यानाच्वंगु दु । थुज्वःगु अवस्थाय् विशेष समिति नं जनसेनापाखें जक ध्यान वियाः नेपाली सेनापाखें मिखा तिस्यिइगु ज्या जुल धाःसा निश्चितरुपं देशय् द्वन्द्वयात ब्वनी । छगू पक्षयात जक निर्देशनय् व निरिक्षणय् तयाः मेगु पक्षयात अनुगमनं पितयंकल धाःसा सेना ल्हातय् वयेत थाकुइगु जक मखु, सचाया स्वाद म्हुतुइ लाकेगु ज्या जुल धाःसा अनमिन प्रमुख करिन लनग्रेनया विश्लेषण वा अभिष्यवाणी शत्य सावित जुइगु संकेट खनेदै । नेपाल सरकारया ल्हातय् मवःगु सेनायात भारतं थःगु सम्पर्कय् तयातःगु जक मखु तःधंगु प्रभावय् लाकाच्वंगु दु । परराष्ट्रमन्त्री, रक्षा मन्त्री जक मखु गुलिखय् जनरलतय्त भारतं थःगु नजिकया सम्पर्कय् तयातःगु आधारयात स्वयेवलय् नं भारतं सेनायात नं थःगु प्रभावय् हयाः माओवादीयात थप पेलेयायेगु पाखे वनाच्वंगु खनेदु । थुज्वःगु अवस्थाय् संसदीय दलतय्सं थःगु दलालीपना त्वःता राष्ट्रिय अवस्थायाप्रति ध्यान मविल धाःसा आःया द्वन्द्वं राष्ट्रिय युद्धया रुपय् विस्तारित जुइगु निश्चित खः ।

More Stories Like this