थौं पोलितब्यूरोया कन्हय् केन्द्रीय समितिया मुँज्या
येँ (झीगु स्वनिगः)
संविधानसभाया दक्ले तःधंगु दल एकीकृत माओवादीया राजनीतिक प्रशिक्षण ज्याझ्वः गुगु कथं न्ह्याकेगु धैगु विषयसं सहलह ब्याकेत थौं पोलितब्यूरोया मुँज्या च्वनीगु जूगु दु । अथे हे कन्हय् केन्द्रीय समितिया मुँज्या च्वनेत्यंगु खः । पार्टी दुनेया निगू लाइन संघर्षया सवालयात कयाः प्रशिक्षणय् यंकेगु ला कि मयंकेगु नापं शान्ति, संविधानया नितिं अधिकतम कुतः यायेगु पंगः थन धाःसा जनविद्रोह यायेगु विषयसं प्रशिक्षण ज्याझ्वःयात गुगु कथं व्यवस्थित यायेगु धैगु खँय् उगु मुँज्याय् सहलह जुइ धकाः धाःगु दु ।
म्हिगः मंगलवाः च्वंगु स्थायी समितिया मुँज्यां आः यात प्रशिक्षण ज्याझ्वः दिकाः अथे पोलितब्यूरो व केन्द्रीय कमिटीया मुँज्या च्वनेगु धकाः खँ क्वःछ्यूगु खः । माओवादीया सोमवाः नेवाः व ताम्सालिङ राज्य समितिया मंकाः प्रशिक्षण ज्याझ्वलय् पार्टीया बहुमतं पारित याःगु लाइनसिबें पाःगु फरक लाइन नं प्रस्तूत याकेमाः धकाः पार्टीया न्वकु डा. बाबुराम भट्टराई नं अडान काये धुंकाः च्वंगु स्थायी समितिया मुँज्यां उगु कथं खँ क्वःछ्यूगु खः ।
