लडाकु ८ गतेनिसें विशेष समितिया मातहतय्

येँ (झीगु स्वनिगः)

माओवादीया लडाकु नापं ल्वाभः थ्व हे माघ ८ गतेनिसें औपचारिक रुपं हे विशेष समितिया मातहतय् यंकीगु जूगु दु । सरकार व एकीकृत माओवादीया दथुइ म्हिगः मंगलवाः उगु कथं सहमति जूगु खः ।
चितवनया शक्तिखोर लागाय शिविरय् विशेष समारोह यानाः हे माओवादीया लडाकुत विशेष समितिया मातहतय् लात धकाः ८ गते घोषणा याइगु जूगु दु । म्हिगः प्रधानमन्त्री माधवकुमार नेपाल व एकीकृत माओवादीया नायः पुष्पकमल दाहाल प्रचण्डया दथुइ जूगु भेटवार्ताय् अथे सहमति जूगु खः । उगु घोषणा समारोहलय् राजनीतिक दलया प्रमुखत, कुतनीतिक नियोगया प्रमुख नापं मेमेपिन्त नं सःतीगु जूगु दु ।