संविधानया एकीकृत मस्यौदा च्वइगु

विवाद मिलेयायेगु जिम्मा नं संवैधानिक समितियात बिल

येँ (झीगु स्वनिगः)

संघीय लोकतान्त्रिक गणतन्त्रात्मक नेपाःया न्हूगु संविधानय् दुथ्याइगु खँय् संविधानसभाय् दुथ्याःगु थीथी राजनीतिक दलतय् दथुइ मतभेद जुयाः च्वंगु दुसां नं आः न्हूगु संविधानया एकीकृत मस्यौदा च्वयेगु ज्या न्ह्याकीगु जूगु दु । संविधानसभाया म्हिगः मंगलवाः च्वंगु मुँज्यां संविधानसभाया नियमावली संशोधन यानाः संवैधानिक समितिया थप अधिकार बिइवं आः अथे एकीकृत संविधानया मस्यौदा च्वयेगु ज्या न्ह्याइ धकाः धाःगु दु । संशोधित नियमावली कथं विवाद जुयाच्वंगु विषययात नं ज्यंकाः यंकेगु अधिकार आः संवैधानिक समितियात ब्यूगु दु । अथे संवैधानिक समितियात अधिकार ब्यूगुलिं आः न्हूगु संविधानया एकीकृत मस्यौदा च्वयेगु ज्या न्ह्यकेत अःपूगु अवस्था ब्वलन धकाः दलया नेतातय्सं धयादीगु दु ।

थ्वसिबें न्ह्यः उगु समितियात संविधानसभाया विषयगत समितितपाखें संविधानसभाय् वने धुंकाः सहमति जुयाः वइगु नापं राजनीतिक दलतय्गु दथुइ सहमति जुइ धुंकाः वइगु खँ दुथ्याकाः न्हूगु संविधानया मस्यौदा च्वयेगु अधिकार जक बियातःगु खः । न्हूगु संविधान च्वयेगु ई झन झन म्हो जुजुं वनाच्वंगुलिं संविधानसभाय् दुथ्याःगु २८ दलया सहमतिया आधारय् हे अथे संविधानसभाया नियमावली संशोधन याःगु खः ।