अनमिन लिहां वनेवं ल्वाभः हयेगु चर्चा

नेपाःया शान्ति प्रक्रियाय् ग्वाहालि यायेगु धकाः वयाच्वंगु अनमिन शान्ति प्रक्रिया पूवने न्ह्यः हे लिहां वनेसातकि हे आः भारतं नेपाःया सेनायात घातक प्रकृतिया ल्वाभः बीगु खँ पिहां वःगु दु। नेपाःयात ल्वाभः बी धकाः भारतं कुतः ला न्हापा हे यानाच्वंगु खःसां आः अनमिन लिहां वनेवं उगु ल्वाभः नेपाः दुहां वइगु चर्चा नं शुरु जुया वःगु दु। आःयात भारतीय अखबारय् पिहां वःगु विषय खःसां अज्याःगु समाचार भारतया सरकारी सूत्रतय्सं हे च्वका हःगु जूगुलिं थ्व खँय् सत्यता दइ मखु धाये मछिं ।

थ्व ई नेपाः युद्धपाखे वनाच्वंगु मखु बरु युद्धं लिहां वयाः शान्तिपाखे वनाच्वंगु ई खः। देशय् शान्ति पलिस्था यायेगु लागिं नेपाली सेना व माओवादीया जनसेनां दुगु ल्वाभः नापं दिकातःगु ई खः थ्व। अथे दिकातःगु ल्वाभः हानं ज्वनेमाःगु अवस्था मवयेमा धकाः कुतः यायेमाःगु थज्याःगु संगीन व संवेदनशील इलय् हानं थप ल्वाभः हयेगुया अर्थ आः तक कायम जुयाच्वंगु शान्तियात भंग यानाः हानं युद्धया तयारी यायेगु खः। यदि भारतं अज्याःगु छुं नं कथंया ल्वाभः नेपाः छ्वया हल धाःसा उकिं देशय् हानं मेगु युद्धया मि च्याका बीगु निश्चित दु। अज्याःगु ल्वाभः हये जक मात्रं नं शान्ति प्रक्रियाया मेगु पक्षया विश्वास त्वाःदलाः कायम जुयाच्वंगु शान्तिइ खलल हया बीगु निश्चित दु। सेनाया नियतय् शंका यासें माओवादीं नं थःगु ढंगं ल्वाभः मुंकेगु तयारी शुरु याना बी। देशय् याउँक शान्ति कायम जुयाच्वंगु इलय् नेपाली सेनायात ल्वाभःया आवश्यकता मदु। ल्वाभः झिके यायेगु ला युद्धया लागिं खः। उकिं थ्व इलय् भारतं ल्वाभः बीगु प्रस्ताव हल धाःसा वयागु नियत नेपाली जनतां बांलाक थुइकेमाः ।

More Stories Like this