जनबाहाःद्यःया लंपुं छायेगु ज्या

रश्मी नापित

वंगु अष्टमिकुन्हु न्हवं क्वचायेधुंकाः जनबाहाःद्यःयात लंपुं छायेगु ज्या आः न्ह्यानाच्वंगु दु। थुकी जनबाहाःद्यःयात स्यंल्ह्वं यायेगु, रंग पायेगु ज्या जुइ। थुकिया निंतिं नवःमिनिसें पुन्हि तक जनबाहाःद्यःयात गमं पिने तइ। द्यः लिकाये न्ह्यः द्यःया जीव (न्यास) लिकयाः कलशय् स्थापना याइ। लंपुं छायेगु ज्या क्वमचाःतले देगलय् च्वंगु कलश हे पुज्यायेगु चलन दु।

जनबाहाःद्यःया लंपुं छायेगु ज्या न्हापा-न्हापा जूसा 'न्वकुजु' धाःगु बिस्कं हे जातिं याइगु खः। तर आः उपिं लोप जुइधुंकूगुलिं द्यःयाथाय् च्वनेगु पाः सुयागु खः उमिसं हे थ्व लंपुं छायेगु ज्या नं याये मालाच्वंगु खँ अनया गुर्जु भाजु स्वयम्भुरत्न वज्राचार्यं कनादिल। थौंकन्हय् जनबाहालय् च्वनाः लंपुं छायेगु ज्या भाजु दयानन्द वज्राचार्यं याना च्वनादीगु दु ।

द्यः लंपुं छायेत लंपुं छाइम्ह मनू अतिकं नियमय् च्वनेमाः। ज्या शुरु याये न्ह्यः सँ खायेमाः। शुद्ध जुयाः नित्य पूजा यानाः जक लंपुं छायेगु ज्या न्ह्याकी। लंपुं छायेगु ज्या जुयाच्वंत्तले छुं नं नये मजिउ। बान्हि लिपा ज्या दिनाः तिनि नः वनी ।

जनबहाःद्यः लंपुं छाइबलय् छ्यलीगु रंगया नं थःगु हे महत्व दुगु जुयाच्वन। लंपु छायेगु रंग दयेकेगु निंतिं न्हापा-न्हापा जूसा पुंतय्गु बिस्कं हे गुथि दुगु खः। आः व गुथि नं मदयेधुंकल। अथे खःसां द्यःया लागिं धकाः विशेष कथंया रंग छ्यानाः दयेकेगु ज्या धाःसा पुं जातियाम्ह हे भाजु नरेन्द्र चित्रकारं याना च्वनादीगु दु ।

लंपुं छायेगु झ्वलय् अप्वः यानाः द्यःया ख्वाः त्वपुया तयेगु याइ। थुकिया कारणं तच्वःगु निभालं द्यःया ख्वाःपाः तज्याना वइ धकाः खः। द्यः लंपुं छाइबलय् अप्वःसिनं न्यनीगु छगू न्ह्यसः जुयाच्वन, थ्व द्यः छुकियाम्ह खः? चायाम्ह लाकि? सिँयाम्ह लाकि? धलौटयाम्ह लाकि? थुकिया बारे भाजु वज्राचार्यं कनादी, 'जनबाहाःद्यः वास्तवय् धातु, सिँ व चा स्वतां तयाः दयेकातःम्ह द्यः खः। छुं जुयाः थ्व द्यः स्यन धाःसा दयेकेत म्हय्पियागु चा छ्यलेमाः ।'

अथे हे साढे ४ फुट ति दुम्ह थ्व झ्वाट्ट स्वयेबलय् मिसाम्ह खः लाकि मिजंम्ह खः धकाः नं धाये फइ मखु। थ्वहे जनबाहाःद्यःया विशेषता खः। लंपुं छाये सिधयेकाः पुन्हि कुन्हु जनबाहाःद्यःयात दशकर्म याइगु चलन दु। थुकिं मचाबू ब्यंकेगु, चुडाकर्म यायेगु, इहि यायेगु, बार्‍हाः तयेगु आदि मिजंमचा व मिसामचा निम्हेसितं याइगु कर्मत याइ। वयां लिपा जक द्यःयात हानं गमय् बिज्याकी ।

जनबाहाःद्यःया पाःलाः च्वनीपिं शाक्य वज्राचार्य यानाः प्यंगू कवः दु। वहे प्यंगू कवः तःधं जुयाः आः २५ गू परिवारय् विस्तार जुयाच्वंगु दु। लंपुं छायेगु ज्या थ्वहे २५ परिवार मध्येया दुजःपिंसं याइ ।

More Stories Like this