उपलब्धी थ्व नं खः, लय्ता वइ

नर्मदेश्वर प्रधान

खँयाखँय्

वंगु मंगलबाः। 'सन्ध्या टाइम्स' य् "खँयाखँय्" स जि गयल जुइ। जि भ्रमण बिदाय्। भ्रमण क्वचायेके। लिहां वये। अनुभव छुं भचा प्वंके ।

वंगु वाः। बाखं दबूया पुचः पूर्वपाखे वने। झापा जिल्लाया धुलाबारीं बाखं दबूयात ब्वना हइ। बाखं च्वइपिं व कलाकारत मुने। धुलाबारी वने। थ्यनी। भाजु दिनेश शाक्यं अन माःगु व्यवस्था याना तइ। जिमि स्वागत सत्कार जुइ।
बाखं दबू थ्वया न्ह्यः पश्चिम भ्रमणय् नं वनेधुंकी। नारायणघाट, बुटवल, लुम्बिनी, पोखराया यात्रा धुनी। आ पूर्वी क्षेत्रय् थ्यनी। बाखं दबूया आज्जु। वंवंथाय् बाखं न्यकेगु। बाखं मार्फत स्थानीय नेवाःतलिसे अन्तर स्वापू स्वनेगु। भाषिक, जातीय, सामाजिक, सांस्कृतिक जागरण थनेगु। देय्या थाय्थासय् छरे जुयाच्वंपिं नेवाःतय् दथुइ दुगु दूरी चीकेगु। गाः ल्हायगु। बाखं दबू, थुकिया निंतिं मिसन जुइ। कुतःत जुइ। थाय्थासय् वनी। लिच्वः चमत्कारी जुइ। बाखं दबूया दाबा मखु। बाखं दबुलिं स्वनिगः व पिनेया नेवाःतय् दथुइ भावनात्मक तरंग थनाबिउगु दु। पिने दुनेया सीमा रेखा हुइत स्वःगु दु। स्वनिगः दुने पिने च्वपिं नेवाःतय् दथुइ दइगु मनोवैज्ञानिक दूरी चीकेत स्वःगु दु। थ्व पक्का। थौ थ्व ईया मागः नं खः। सकसियां दायित्व नं जुइ। साहित्य, संस्कृतिं थुखेर छुं यायेमाः। बाखं दबूयात थ्व बोध जुइ। स्वनिगलं पिने वनी। फूगु कुतः याइ। संबछि जकया उपलब्धी यायेफुसां बाखं दबुलिं थःत धन्य तायेकी। गर्व याइ ।

बाखं दबू झापाय् वयेगु खँ जुइ। भाजु दिनेश शाक्ययात कने। भाजु दिनेशं ब्वना पौ छ्वया हइ। बाखां दबू छु खः। स्पष्ट याना बीत इनाप याइ। जरुर खः। उद्देश्य सी मखु। अनेक शंका जू वनेफु। बाखं दबू राजनीतिक पार्टीतय् कचा खःला? छु विचार प्रचार प्रसार याः वयेत्यंपिं जुइ ला? बाखं दबू विषयय् न्ह्यसः जुइफु। अनर्थ जू ननेफु। जिमिसं थुइके। बाखं दबुलिं थःगु अवधारणा पत्र तयार याइ। थःगु आज्जु छर्लङ्ग ब्वइ। गन गन कार्यक्रम जुइ, बाखं दबुलिं थःगु अवधारणा पत्र ब्वइ ।

धुलाबारीया तःधंगु हल, बाखं दबूया ज्याझ्वः। तःजि कथं न्ह्याइ। मनूत मुनी। यक्वस्यां नेवाःभाय् मथू खनिं। ब्वंगु बाखंतय् नेपाली अनुबाद न्यंके माली। झापाया प्रमुख जिल्ला अधिकारी व प्रहरी एसएसपी ज्याझ्वलय् विशिष्ट पाहां जुइ। निम्हं नेवाः। प्रजिअ व एसएसपीया उपस्थितिं ज्याझ्वलय् न्हूगु अनूभुति जुइ। इतिहासया छगू कालखण्ड लुमनी। गबलय् थज्याःगु कार्यक्रमयात पनेगु ज्या प्रजिअ व एसएसपीपाखें जुइ। तर थौं इतिहास हिली। प्रजिअ व एसएसपी नेपालभाषाया ज्याझ्वलय् सहभागी जुइ। च्वनी। बाखंत नुगः बियाः न्यनी। न्यंगु जक मखु ज्याझ्वलय् निम्हेसिनं न्वचु बी। नुगःखँ प्वंकी ।

वय्कःपिनिगु नुगःखँय् नेवाः जातिबोध, गर्व पिज्वइ। अनुभव जुइ। वय्कःपिं ज्या�वलय् प्रजिअ व एसएसपी जुयाः जक वयाच्वंगु मखु। नेवाःया काय्मचा जुयाः वयाच्वंगु दु। एसएसपी यूनिफर्मय्। तर वय्कलं थःगु जाति भाषा प्रति मुक्त कथं चिउताः क्यनी। न्वचु बी। सकलें प्रभावित जुइ। प्रशासन, पुलिस प्रशासनय् नं थौं जातीय चेतना, अस्मिता बोध महसुस जुया वयाच्वंगु दु। प्रजिअ व एसएसपीया न्वचु न्यनाः वाःचायेके फइ। बाखं दबूया सरोकार साहित्यया बाखं बिधालिसे जक मखु। हरेक ख्यलय् च्वंपिनि नुगलय् सुलाच्वंगु बाखंतय्त कुलेगु नं जुइ। प्रजिअ व एसएसपीया जातीय सरोकार, चेतनां जाःगु न्वचु बाखं थें अनुभूत जुइ ।

मुल लक्ष्य धुलाबारी। थ्यनी। अन नयेगु त्वनेगु सुबिधा दइ। भाजु दिनेश शाक्ययात बाखं दबू प्रति गर्व जुइ। धुलाबारीं धरान, धनकुटा, इटहरीइ नं ज्याझ्वः जुइ। बाखं वाचन जुइ। कलाकारतसें प्याखं क्यनी। कुमारी नृत्य, चर्या नृत्य, लोक नृत्य। सकसिनं ययेकी। धनकुटाय् ।

कलाकारतलिसे बाखं च्वमिपिं स्थानीय दर्शकत प्याखं ल्हुली। माहौल संगीतमय नृत्यमय जुइ। धरान, इटहरीइ नं ज्याझ्वः सफल जुइ। बाखं दबूयात वंवंथाय् आत्मियता क्यनी। स्वागत सत्कार याइ। विराटनगरय् नेवाः महोत्सव जूगु। बाखं दबू पलखयात अन नं थ्यनी ।

कलाकारतय् व्यवस्था गणेशरामजुपाखें जुइ। कलाकारत नं बाखं दबूया परिवार जुइ। देय्या थाय्थासय् च्वंपिंत भावनात्मक निकटता स्वनेगु खँय् कलाकारतसें नं योगदान बी। फुक्क ज्याझ्वलय् बाखं दबूया संयोजक लक्ष्मण राजवंशीजुं सारगर्वित न्वचु बियादी। स्रोतात तसकं हे प्रभावित जुइ ।

स्वनिगलय् च्वंपिं नेवाःतय्के बडकपन दु। इमिसं पिने च्वंपिंत गाःमाः खंकी। गुलिसियां शंका याइ। नेवाः भाय् नवाइ मखु। लिचिली। बाखं दबुलिं थ्व शंका हुइ। सकसितं इनाप याइ। विश्वास बी। झी सकलें समान। पारस्परिक सम्मानया निंतिं जिपिं वयाच्वना। झापा, धरान, धनकुटा, इटहरी वने न्ह्यः स्वयां वना वयेधुंकाः इपिं जिमित सतीगु अनुभव जुइ। छगू हे घेराय् खनी। बाखं दबूया उपलब्धी थ्व नं खः। जिमित लय्ताः वइ ।

More Stories Like this