विवादं माओवादीया प्रशिक्षण स्थगित
कन्हय् पोलिटब्यूरो व कंस केन्द्रीय समितिया बैठक आह्वान
येँ (सन्ध्या टाइम्स)/एकीकृत माओवादीया नेतातय् दथुइ निगू लाइन संघर्षया विषयय् प्रशिक्षण ज्याझ्वलय् यंकेगु ला कि मयंकेगु धइगु बारे तच्वकं विवाद जूगुलिं आःयात राजनीतिक प्रशिक्षण ज्याझ्वः हे स्थगित याःगु दु ।
थौं सुथय् माओवादीया स्थायी समितिया बैठकं राजनीतिक प्रशिक्षण ज्याझ्वःयात हे स्थगित यायेगु निर्णय याःगु खः। विवाद तच्वःगुलिं समस्या समाधान यायेत कन्हय् पोलिटब्यूरोया अले कंस विहिवाः केन्द्रीय समितिया बैठक च्वनेगु निर्णय नं थौं याःगु दु ।
आः समस्या समाधान यायेगु नितिं पोलिटब्यूरो व केन्द्रीय कमिटीया बैठक आह्वान याइगु खँ माओवादीया नेतातय्सं धयादीगु दु। माओवादीया राजनीतिक प्रशिक्षणया झ्वलय् म्हिगः केन्द्रीय विशेष ब्यूरो अन्तर्गतया नेवाः व ताम्सालिङ राज्य समितिया जिल्ला सदस्यतय्त प्रशिक्षण बीगु झ्वलय् पार्टीया फरक लाइनयात न्ह्यब्वये दयेमाः धकाः माग यासें न्वकु डा. बाबुराम भट्टराईनं प्रशिक्षण ज्याझ्वः बहिष्कार यानादीगु नापं प्रशिक्षण ज्याझ्वलय् हे फरक मत तये दयेमाः धकाः पोलिटब्यूरो दुजः हिसिला यमिं माइकं न्ववानादीवं अनया विवाद तच्वया वःगु खः ।
