प्यम्ह छ्याञ्जेया सरुवा व निम्ह न्हूपिं नियुक्ति
येँ (झीगु स्वनिगः)
कामचलाउ सरकारया वैठकं प्यम्ह छ्याञ्जेया सरुवा व निम्ह न्हूपिं नियुक्तीलिसे दर्जन स्वयाः आपालं दूरगामी महत्वया राजनैतिक निर्णय याःगु दु । प्रधानमन्त्रीया ज्याकू सिंहदरवारय् सोमवाः सुथय् च्वंगु बैठकं येँ महानगरपालिकाया कार्यकारी प्रमुख आनन्दप्रसाद पोख्रेलयात क्षेत्रीय प्रशासन ज्याकू सुर्खेत, शिविर ब्यवस्थापन समितिपाखें शितलबाबु रेग्मीयात उर्जा मन्त्रालयसं, केशब भट्टराईयात भूमिसुधार लिसे ब्यवस्थापन मन्त्रालयया छ्याञ्जेय् व छविलाल पन्तयात क्षेत्रीय प्रशासन ज्याकूया प्रमुखय् सरुवा यायेगु निर्णय याःगु खः । उकथं हे बैठकं मालदिभ्सया नितिं महाबाणिज्यदूतय् तुलसीराम अग्रवालयात व खानेपानी संस्थानया महाप्रबन्धकय् धर्मकुमार बजिमययात नियुक्ति यायेगु निर्णय नं याःगु दु ।
वैठकं आवंनिसें एसएलसीया न्ह्यसः पौ नेपालय् हे छापय् यायेगु निर्णय याःगु दु । व्यवस्थापिका संसदया सार्वजनिक लेखा समितिं न्ह्यसः पौ नेपालय् हे छापय् यायेत सरकारयात उजं बिइवं सरकारं थज्याःगु निर्णय यायेत बाध्य जूगु खः । थ्व स्वयाः न्ह्यः एसएलसीया न्ह्यसः पौ भारतय् छापय् यानाः वयाच्वंगु खः ।
