व्यवस्थापिकाय् दलतय्गु विचाः ल्वात, माओवादीया च्यूताः

येँ (झीगु स्वनिगः)

प्रधानमन्त्री निर्वाचन सम्बन्धी नियमावली संशोधनया मस्यौदाय् दलतदथुइ सहमति जुइमफयेवं म्हिगः सःतूगु व्यवस्थापिका संसदया बैठक स्थगित जूगु दु । प्रधानमन्त्री ल्ययेत छक्वःपतिकं निर्वाचन यायेम्वाःगु नियमावलीयात संशोधन यानाः अप्वलय् निगूगु चरणपाखें देशं न्हूम्ह प्रधानमन्त्री दइगु व्यवस्था नियमावलीइ तयेगु गृहकार्य याःसां नं सहमति जुइमफूगु खः । प्रधानमन्त्रीया थीथी प्रस्तावयात पालंपा निर्णयार्थ निर्वाचनय् यंकेगु आःया नियमावलीया व्यवस्थायात संशोधन यानाः फुक्क प्रस्तावयात छक्वलं मतदानय् यंकेगु व्यवस्था यायेगु विषयसं सहलह जुइवं म्हिगः खँ क्वःछीमफूगु खः । विवाद समाधान मजुइवं म्हिगःया संविधानसभा बैठकय् सभामुख सुभाषचन्द्र नेम्वाङं व्यवस्थापिका संसदया वैठक म्हिगः सःतूगु बैठक च्वनेमफइगु सुचं ब्वना न्यंकूगु खः । बैठक थौं न्हिनय् निताः त्या इलय् च्वनेगु जानकारी ब्यूगु दु । अथेहे, नेपाःपाखें अनमिन लिहांवनेवं सरकार व माओवादीदथुइ जूगु स्वंगू वुँदे सहमतिया अपव्याख्या यायेगु कुतः जूगु धासें उगु पार्टीं च्यूताः प्वंकूगु दु ।

विहीवाःया सहमतिइ अनमिनं याइगु फुक्क ज्या सेना समायोजन विशेष समितिया मातहत वःगु सहमति जुइधुंकूगु अवस्थाय् समितिया हे छुं दुजःतय्सं नेपाली सेना अनुगमनय् मदुगु धायेवं माओवादीं च्यूताः प्वंकूगु खः । म्हिगः उगु हे विषययात कयाः माओवादी नायः प्रचण्ड व प्रधानमन्त्री माधव कुमार नेपालदथुइ जूगु नापलाये ज्याय् प्रचण्डं नेपाली सेना अनुगमनय् मदुगु धइगु विशेष समितिया छुं दुजःतय्गु धापूप्रति च्यूताः प्वंकूगु खः । नायः प्रचण्डं नापलाये ज्याय् विहीवाःया स्वंगू वुँदे सहमतियाबारे प्रधानमन्त्रीया ध्यानाकर्षण यानादीगु खः । विहीवाःया सहमतिया समीक्षात्मक सहलह जूगु नायः प्रचण्डं सञ्चारकःमिपिंत जानकारी बियादीगु खः । सरकार व माओवादीदथुइ जूगु सहमतिइ माओवादीया न्हय्गू शिविरय् दुगु ल्वाभः व नेपाली सेनाया छाउनीस्थित कन्टेनरय् तयातःगु ल्वाभःया व्यवस्थापन व अनमिनं यानाः वयाच्वंगु मेमेगु व्यवस्थापन विशेष समितिं न्ह्यथंगु दु ।