राष्ट्रिय दलत अप्वइगु

थौंकन्हय् संविधानसभाय् नीच्यागू राजनीतिक दलतय्गु अस्तित्व दु । निगू दर्जनं मयाकं दुगु दलत मध्ये यक्को दलत सरकारय् नं सहभागी जुयाः थःपिनिगु दुनो तप्यंकाः वयाच्वंगु दु । सरकारय् सहभागी दलत सरकारय् छु सहभागी जुल, चिठ्ठां लाःगुकथं तायेकाः धेबा कमय् यायेगु माध्यम दयेकाः वयाच्वंगु दु । खःगुं मखुगुं ज्या यानाः व्यक्ति व पार्टीया नितिं माःगु खर्च मुंकेगु याना वयाच्वंगु दु । थुकिं सरकार थःहे घुस, भ्रष्टाचार व कमिशनया चक्करय् लानाच्वंगु खं आः छुं न्हुगु खँ मखय् धुंकूगु दु । वंगु संविधानसभाया चुनावय् ३ प्रतिशत मत काःपिंत राष्ट्रिय दलया मान्यता ब्यूगु खः । ३ प्रतिशत काःपिं निगू दर्जनया हाराहारीइ दुगुयात दलतय्गु विभाजन व टुटफुट लिपा थौं नीच्यागू दलतय्गु अस्तित्व संविधानसभाय् दयाच्वंगु दु । टुटफुटया प्रक्रिया अझ नं द्यूगु मदुनि, विभाजनया संहारय् निगू प्यंगू दलत अझ नं थ्यनाच्वंगु स्वयेबलय् थ्व ल्याः अझ अप्वयाः वनीगु खनेदु । संख्यात्मकरुपं थुगुकथं अप्वइगु धयागु गुणात्मकरुपं सकारात्मक लिच्वः त्वःतीगु खनेमदु । थ्व संख्या गुलि गुलि अप्वः जुइ राष्ट्रिय राजनीतिइ उलि हे अप्वः नकारात्मक प्रभाव त्वःतीगु खँय् शंका मदु ।

थौंया राजनीतिक गतिरोधया छगू प्रमुख कारण राजनीतिक दलतय्गु अप्वः ल्याः नं खः । गुलि अप्वः राजनीतिक दलत दइ, उलिहे अप्वः समस्या पिहांवइगु खँ विगतया इतिहासं स्पष्ट यानाच्वंगु खँ खः ।
वंगु आइतवाः स्वंगू दलया शीर्ष नेतातय्गु बैठकं उगुकथं चुनावय् सहभागी जुइगु फुक्क दलतय्त राष्ट्रियस्तरया मान्यता बीगु धकाः क्वछ्यूगु खः । थ्वहे विषययात कयाः थौं स्वयाः छुं ला न्ह्यः नं प्रस्तावित जूगु खः । अबले नेपाली कांग्रेस, एमाले लगायत संसदीय दलतय्सं थुकिया विरोध याःगु खःसा थौं वयाः थ्वहे विषययात सहर्ष स्वीकार यानाः वातावराणयात सहज यानाब्यूगु खः । आः चुनावय् ब्वतिकयाः न्हापाथें ३ प्रतिशत मत कायेहेमाः धयागु आधार मन्त । निर्वाचन आयोगय् दर्ता जुयाः चुनावय् ब्वति जक कायेवं हे राष्ट्रिय दलया मान्यता प्राप्त जुइगु सहज व सामान्यरुप काःगु दु । थुकिं वइगु चुनावंनिसें दलतय्गु संख्या अझ अप्वइगु निश्चित खः । छुं विकृतित न्ह्यःने मवइमखु ।

अथे खयां नं चुनावय् ब्वति जक कयाः राष्ट्रिय दलया मान्यतां प्राप्त यायेगु नितिं सर्वसाधारण जनता व समुदायत राजनीतिक दलय् समाहित यायेगु, राजनीतिक ख्यलय् लगय् जुइगु वातावरण दयेकाबीगु खँय् धाःसा विवाद मदु । थुकिं जनताय् दुहांवनाः जनताया सेवा यायेगु हौसला व अवसर बीगु अवस्था सृजना जुइ । जनताया पासा सु, शत्रु सु म्हसीकेत ग्वाहालि याइ । थुगु दृष्टिकोणं राजनीतिक दलतय्गु संख्याय् हइगु हिउपाःयात निश्चितरुपं सकारात्मक पक्ष मधासे मगाः ।

More Stories Like this