अन्ततः भारतया डिजाइनया खुलासा

येँ (झीगु स्वनिगः)

नेपाःया शान्ति प्रक्रियाय् संयुक्त राष्ट्रसंघीय मिसन अनमिन च्वनाच्वंगुलिं ज्यामछिं महसूस यायेगु अले अनमिनयात नेपालं पितना छ्वयेगु नितिं इलय् ब्यलय् थीथी राजनीतिक दलया नेतातय्गु माध्यमं भूमिका म्हिता वयाच्वंगु भारतया अन्ततः थःपिनिगु डिजाइनया स्पष्ट जुजुं वःगु दु । नेपाःया सुरक्षाय् ल्हाः तयेगु दाउ कयाः वयाच्वंगु भारतं राष्ट्रसंघीय मिसन अनमिन वनेवं नेपाःया सेनाया नितिं घातक ल्वाभः बिइगु तयारी याःगु खुलासा जूगु दु । म्हिगः सोमवाः जक पिदंगु भारतीय छगू न्हिपौ इन्डिएन एक्सप्रेसय् आः नेपाःया नितिं भारतं घातक ल्वाभः बिइगु तयारी याःगु दु धकाः बुखँ पिदनेवं भारतया उगु डिजाइन खुलासा जूगु खः । नेपाःया एकीकृत माओवादी संविधानसभाय् दक्ले तःधंगु दल जूगुलिं हीमीचाया माओवादीया साइज घटेयायेमाः धकाः सूत्र ज्वनाः न्ह्याना वयाच्वंगु भारत लिपांगु इलय् अनमिनं नेपाः त्वःता वनेगु अवस्था वयेवं तसकं लयेताःगु दु । भारतं आः लोकतन्त्र रक्षाया नितिं धकाः छगू कथं माओवादीयात ख्यायेत अले भारत पक्षधर नेतातय्गु हावी यायेगु नितिं उगु कथं न्हूगु ज्या न्ह्याकेत्यंगु खः ।

तत्कालीन शाही शासन कालंनिसें नेपाःया नितिं ल्वाभः व सेनायात तालिम तकं बिइगु ज्या दिनाच्वंगु खःसा आः अनमिन वने धुनेवं नेपाःया सुरक्षाय् थःपिं हावी जुइगु नितिं अथे तालिम बिइगु नाप नापं घातक ल्वाभः बिइगु तकं तयारी याःगु खः धकाः अःपुक हे अनुमान यायेफैगु अवस्था ब्वलंगु दु । भारतं गुलि गुलि नेपाःया सेनायात घातक ल्वाभः ग्वहालि याइ उलि उलि नेपालय् ल्वापु ख्यापुया अवस्था तच्वयाः वनीगु खँय् सुयां निगू मत दैमखु ।