कुमार कान्छा मन्त
येँ (झीगु स्वनिगः)
लोकंह्वाःम्ह गायक कुमार कान्छा म्हिगः सोमवाः मन्त । नेपालभाषाया म्ये नं हालादीम्ह कुमार कान्छा भारतया मुम्बईया अस्पतालय् वासः याकु याकुं मदुगु खः । थ्यंमथ्यं न्हय्ला न्ह्यःनिसें मुम्बईया माहिमपश्चिम एसएल रहेजा अस्पताय् वासः यायां हे मदुगु खः । कान्छाया स्पाइनल कार्डय् ट्युमर खने दुगु खः । ट्युमरया अप्रेसनलिपा शरिरया च्वय्यागु चलेजूसां नं निपा हे तुति चले मजूगु खः । अबु मनबहादुर शाह जागिरया सिलसिलाय् दैलेखपाखें कोलकात वंगु इलय् कुमार २०१४ साल मंसीर २८ गते जन्म जूगु खः ।
वय्कःया जहान व निम्ह काय् दु । कुमार कान्छां नेपाःया सच्छिगुलिं मल्याक संकिपाया नितिं म्ये हालादीगु दु । कुमार कान्छां लाहुरे, कोसेली नापं मेमेगु संकिपालय् अभिनय तकं यानादीगु दु । नेवाः भाय्या नं यक्व हे ल्वःकंह्वाःगु म्ये हालादीम्ह वय्कः भारतया संगीत ख्यलय् नं तसकं लोकंह्वाःम्ह खः । मदुम्ह कुमार कान्छां २५ सिबें अप्वः भाषाया द्वःछिपुं मल्याक म्ये हालादीगु दु ।
