जनमोर्चायात मधेसवादी विद्यार्थीतय्सं लिनाहल
येँ (झीगु स्वनिगः)
संघीयताया विरोध यानाः वयाच्वंगु राष्ट्रिय जनमोर्चा नेपालया कार्यकर्तातय्त मधेसवादी दलया विद्यार्थीतय्सं लिनाहःगु दु । संघीयताया विरुद्ध आन्दोलन यानाः वयाच्वंगु जनमोर्चाया कार्यकर्तातय्सं म्हिगः सोमवाः संघीयता विरुद्धय् पम्पलेटिङ, माइकिङ यानाच्वंगु इलय् मधेशवादी दलतया विद्यार्थीतय्सं संघीयताया विरोध याये दैमखु धकाः अथे लिनाहःगु खः ।
सुनसरीया इनरुवाय् उगु कथं संघीयता विरोधी गतिविधि यानाच्वंगु इलय् राष्ट्रिय जनमोर्चाया कार्यकर्तातय्त लिनाहगु खः । इमिसं संघीयता विरोधी ज्याझ्वः यात धाःसा बांलाइ मखु धकाः ख्याच्वः तकं ब्यूगु खः । थ्वसिबें न्ह्यः नं राष्ट्रिय जनमोर्चाया नेता कार्यकर्तातय्सं लिम्वुवानय् संघीयता विरोधी अभियान न्ह्याकूगु इलय् लिम्बुवानया कार्यकर्तातय्सं लिना हयेगु ज्या इलय् ब्यलय् याना वयाच्वंगु खः । नेपाः संघीय गणतन्त्र जुइ धुंकूगु अवस्थाय् हे संविधानया भावनाया अःखः राष्ट्रिय जनमोर्चां संघीयता विरुद्ध अभियान न्ह्याका वयाच्वंगु खः ।
