भारतं घातक ल्वाभः बीगु
येँ (सन्ध्या टाइम्स)/नेपालय् शान्ति प्रक्रिया पूवंकेगु निंतिं धकाः राष्ट्रसंघीय मिसन अनमिन च्वनाच्वंगुलिं हीमी चायाच्वंगु भारतं अन्ततः अनमिन नेपालं लिहां वनेवं हे नेपाली सेनायात घातक ल्वाभः बीगु तयारी याःगु दु ।
लोकतन्त्र रक्षा व नियमित तालिमया नितिं धकाः भारतं नेपाल सरकारयात घातक ल्वाभः बीगु तयारी यानाच्वंगु खः। वंगु महिनाय् जक नेपालं याःगु अनौपचारिक इनाप कथं भारतं घातक ल्वाभः बीत्यंगु खः ।
भारतं अत्यावश्यक ल्वाभः व बन्दोबस्तीया सामान उपलब्ध याना बीगु तयारी यानाच्वंगु खँ थौं पिदंगु भारतीय न्हिपौ इन्डियन एक्सप्रेसय् च्वयातःगु दु ।
थ्वसिबें न्ह्यः भारतं नेपाःयात बख्तरबन्द गाडी, गोली गठ्ठा व पुलांगु ईन्सास राइफल बिया वयाच्वंगु खःसा थुगुसी अत्याधुनिक हतियार व बन्दोबस्तीया सामग्री उपलब्ध याकेगु तयारी यानाच्वंगु दु खँ नं उगु पत्रिकाय् न्ह्यथनातःगु दु ।
भारतीय स्थल सेनाध्यक्ष विजय कुमार सिंहं वंगु महिनाय् नेपाः भ्रमण यानादीगु झ्वलय् नेपाल सरकारं अबरुद्ध जुयाच्वंगु सैन्य सहयोगयात निरन्तरता बीत माग याःगु खः ।
न्हापा भारतं नेपाली सेनायात नियमित रुपं तालिम व अभ्यास याका वयाच्वंगु खःसां नं तत्कालिन शाही शासन लिपा थज्याःगु सैन्य ग्वाहालि दिनाच्वंगु खः ।
