राष्ट्रिय ध्वाँय् व राष्ट्रिय पार्टीया सहमति

न्हूगु नेपाः दयेकेगु झ्वलय् नेपालं थौंकन्हय् प्रयोग याना वयाच्वंगु राष्ट्रिय ध्वाँय् हिलेमाः धकाः माओवादीपाखें दवाव वयाच्वंगु खःसां आः वर्तमान ध्वाँय् हे ठीक खः बरु उकियात ब्याख्या धाःसा न्हूगु ढंगं यायेगु धइगु खँय् स्वंगू तःधंगु दलया नेतातय् दथुइ सहमति जूगु दु। वर्तमान ध्वाँय् हिलेमाः धकाः क्रान्तिकारी माओवादीपाखें प्रस्ताव वःगु खःसां आपालं मनूत उकिया विरुद्धय् दुगुलिं थुकिया बारे निर्णय याये मफयाच्वंगु खः। आः माओवादी नं थुकी सहमत जुइवं ध्वाँय्या विवाद ज्यनावंगु दु। सखे थ्वहे ध्वाँय् कायम जुइगु खँय् आः मेगु छुं नं समुदायपाखें विरोध वइ मखु जुइ ।

आः जूगु मेगु महत्वपूर्ण सहमति धइगु राष्ट्रिय पार्टी जुइत चुनावय् ३ प्रतिशत मत हयेमाः धकाः न्हापा याना तःगु प्रावधानया खारेजी खः। संविधानया थ्व प्रावधान खारेज यायेमाः धकाः नेमकिपां न्हापांनिसें हे सः तया वयाच्वंगु खःसा लिपा वयाः मेमेगु नं आपालं चीधंगु पार्टीतय्सं नेमकिपाया उगु सःयात साथ बिया हःगु खः। आः बल्ल उगु सलं सार्थकता काःगु दु। नेपाः आः संघीय व्यवस्थाय् वनेधुंकल कि अन आपालं क्षेत्रीय पार्टीत निर्माण जुया वइगु स्वाभाविक खः। तर क्षेत्रीय पार्टीया दायरा प्रदेश दुने जक सीमित जुइगु जूगुलिं उमिसं राष्ट्रव्यापी रुपं हे ३ प्रतिशत भोट हयेगु प्राविधिक रुपं सम्भव मदयेफु। अज्याःगु अवस्थाय् क्षेत्रीय रुपं पकड दुगु खःसां अज्याःगु पार्टीयात राष्ट्रिय पार्टी मखु धकाः धायेगु पाय्छि मजुइफु। उकिं आः चुनावय् ब्वति काइगु फुक्कं हे दलयात राष्ट्रिय पार्टीया मान्यता बीगु धकाः याःगु सहमति लसकुस यायेबहः जू। थुकियात २८ दलया बैठकं नं पारित याइगु आशा कायेफु ।

More Stories Like this