जनबाहाःया किपा स्वस्वं

शीला साय्मि

कनक चैत्य महाविहार धकाः नापं प्रख्यात जुयाच्वंगु जनबहालय् न्हापांखुसी जनबहाःद्यः लिसे सम्बन्धित किपा ब्वज्या जुयाच्वंगु दु। वंगु पोहेलाथ्व अष्टमि (जनबहाःद्यः न्हवं) कुन्हु निसें वइगु मिला पुन्हि तक जुइगु उगु ब्वज्याय् मुक्कं ७८ पाः ८/१२ साइजया किपा व छपाः तपाःगु नापं न्हय्पाः चिचीपागु किपा ब्वयातःगु दु। वहःया पाँय्म्वह पिथना पुचःया ग्वसालय् उगु ब्वज्या जूगु खः। ग्वसाः खलःया धापू कथं ब्वज्याया मू आज्जु धयागु जनबहाः सुचुकुचु यायेगु खः, उकिं थुकिं मुंगु ध्यबा दक्वं समितिइ दुथ्याकाः सुचुकुचु यायेगु ज्याय् हे छ्यलेगु जुइ। अथे हे विश्वय् हे प्रख्यात जनबाहाःद्यःया दछियंकया जात्रा, पर्व व पूजाया बारे जानकारी बीगु नापं धर्म व संस्कृतिलिसे प्रत्यक्ष व अप्रत्यक्ष रुपं स्वापू दयाच्वंगु बाहाःया संरक्षण यायेगु नं थुकिया आज्जु खः ।

छवाःयंकं ब्वइगु उगु किपा सुथय् गुताः इलंनिसें सनिलय् तक न्ह्याइ। ब्वयातःगु किपा मध्ये दकलय् पुलांगु १९९० सालया खः। तःभुखाचं जनजीवन हे अस्तव्यस्त जुयाच्वंगु इलय् रथ दयेकेगु सम्भव मदयाः खतय् तयाः जनबाहाःद्यःया जात्रा न्ह्याकाच्वंगु किपा दकलय् महत्वपूर्ण खनेदु। थुकिं प्रमाणित याः कि जनबाहाःद्यःया जात्रा परम्परांनिसें थौंतकं मदिक्क हे न्ह्यानाच्वंगु दु।
अथे हे २०५४ सालया लगमय् रथ मिं नःगु किपा नं दु। उगु किपां झीत छक्वः हाकनं २०२५ सालय् नं लगमय् हे जनबाहाःद्यःया रथ मिं नःगु घटना लुमंका बिउ। २०६४ सालय् रत्नपार्क लागाय् रथ क्वःदःगु घटना नापं हलिमलि ब्वयातःगु, सर्वसंघया दुजःपिं तुतः ब्वनाच्वंगु, लंपुं छायेगु, ल्वंचामरि, चतांमरि ह्वलाच्वंगु नापं आपालं किपात उकी दुथ्याः। नापनापं छगू बहुमूल्य मूभि नं प्रदर्शन जुयाच्वंगु दु। थुगु मूभि २०२४ सालं जूगु रथ जात्राया खः। मूभि छम्ह फ्रेन्च नागरिक कर्णेलि जेष्टपाखें प्राप्त जूगु खः। मुक्कं झिगू मिनेट दुगु उगु मूभिं हाकनं छक्वः झीत ४३ दँ न्ह्यःया येँदेय्या जनजीवन अध्ययन यायेगु ह्वःताः चूलाका बिउगु दु ।

थ्व फुक्कं किपाया मू छपाःया निसः तका तयातःगु दु। किपात अप्वः यानाः सम्बधित व्यक्तिपाखें प्राप्त जूगु व न्हूगु आपालं किपा भाजु आलोक तुलाधरं खिचे यानातःगु खँ ग्वसाः खलकं धाःगु दु। प्रदर्शनय् तयामतःगु व मुंके मलाःगु मेगु नं महत्वपूर्ण किपात ब्वयेमाःगु आवश्यकता दुगुलिं थुज्वःगु ब्वज्या हाकनं यायेगु बिचाः वय्कःपिनि दु।
थुज्वःगु किपा ब्वज्यां धर्म, संस्कृति, परम्परा जक संरक्षण जुइगु मखु कि परम्परागत विषयय् अध्ययन अनुसन्धान याइपिंत नं छगू बांलाःगु अवसर प्राप्त जुइगु खनेदु ।

More Stories Like this