संविधानसभाया निंतिं नेवाःतय्पाखें पित बिउगु लुमंका पौ

दस्तावेज

नेवाः स्वायत्त राज्य मंकाः संघर्ष समितिपाखें वंगु विहीवाः यलय् याःगु नेवाः एकता दिवसया ज्याझ्वलय् थुगु लुमंका पौ सार्वजनिक याःगु खःसा म्हिगः मंकाः संघर्ष समितिया छथ्वः पदाधिकारीपिंसं संविधानसभाया अध्यक्ष सुभाष नेम्बाङयात थ्व पौ लःल्हाना थकूगु खः ।

नेपाःमिं जनतां सलंसःदँ न्ह्यवंनिसें उत्पीडन व विभेदया विरुद्ध यानावःगु थीथी शान्तिपूर्ण आन्दोलन व सशस्त्र विद्रोहपाखें अनुमोदित संघीयता, लोकतन्त्र व गणतन्त्र अले धर्मनिरिपेक्ष राज्ययात संस्थागत यायेत संविधान सभापाखें नेपाःया न्हूगु संविधान च्वयाः नेपाःया राज्य पुनःसंरचना जुइत्यंगु थौंया राष्ट्रिय राजनीतिक लकसय् नेपाःया छगू मू आदिवासी नेवाः समुदायया सकल समुदाय व थीथी राजनीतिक दलया मनूत नेवाः स्वायत्त राज्य मंकाः संघर्ष समितिया ध्वाँय् क्वय् छप्पँ छधी जुसें नेवाःतय् द्वलंद्वः पुलांगु इतिहास, विश्व मानव अधिकारया सिद्धान्त, अन्तर्राष्ट्रिय श्रम संगठन - १६९ अले आदिवासी अधिकार सम्बन्धी विश्वब्यापी घोषणा-पत्रपाखें आदिवासीपिंत प्रत्याभूत यानातःगु अधिकारया लिधंसाय् नेवाःतय् आदिभूमि नेपालमण्डल दुनेया भूभागय् नेवाः स्वायत्त राज्यया अधिकार सुनिश्चित जुइमाःगु सम्बन्धय् थुगु मंकाः संघर्ष समितिपाखें ११२९ पोहेलागाः ६ (२०६५ माघ ३) कुन्हु छगू लख मनूतय् जुलुसलिसें वयाः संविधान सभाय् औपचारिक रुपय् लःल्हाःगु सैद्धान्तिक अवधारणापाखें निर्देशित जुसें, नेवाःतय् थःगु ऐतिहासिक लागाय् स्वायत्तता, स्वशासन, आत्मनिर्णय व अग्राधिकार दइगु नेवाः स्वायत्त राज्य नीस्वनेगु खँ संविधानसभापाखें संविधान च्वयेगु इलय् दुथ्याकेमाः धइगु खँ देय्या लखंलख नेवाःत येँया राष्ट्रिय रंगशालाय् मुनाः ११३० पोहेलाथ्व ९ (२०६६ पुस ११) कुन्हु थःथम्हं नेवाः स्वायत्त राज्यया घोषणापाखें याःगु सार्वजनिक राजनीतिक अनुमोदनया लिधंसाय्, थ्वहे मंकाः समितिपाखें संविधान समितिया राज्य पुनःसंरचना व राज्यशक्ति बाँडफाँड समितियात नेवाः स्वायत्त राज्यया सम्बन्धय् ११२९ दिल्लाथ्व ९ कुन्हु लःल्हाःगु १३ बुँदाया माग पत्रयात लुमंकुसें, अथेहे, नेवाः स्वायत्त राज्यया शासकीय स्वरुपंनिसें आर्थिक, सामाजिक, सांस्कृतिक, भाषिक, सांस्कृतिक नीति, पिनेया नेवाः समुदाय, अल्पसंख्यक तथा गैरनेवाः समुदायया अधिकार सुनिश्चित यायेत ११३१ कछलागाः ११ व १३ (२०६७ मंसिर १७ व १८) थिमि मध्यपुरय् जूगु नेवाः राष्ट्रिय राजनीतिक सम्मेलनपाखें निर्देशित सैद्धान्तिक पक्षयात बःबीगु कथं, संविधानसभापाखें संविधान दयेकेगु सम्वन्धय् आः सहलह ब्याकाच्वंगु झ्वलय् क्वय् न्ह्यथनातयागु फुक्कं खँ दुथ्याकेमाः धइगु नेवाः समुदायया मंकाः सः कथं लुमंकेत नेवाः स्वायत्त राज्य मंकाः संघर्ष समितिपाखें थौं ११३१ पोहेलाथ्व ९ (२०६७ पुस २९) कुन्हु यलया पूच्वय् ग्वसाः ग्वःगु नेवाः एकता दिवसय् न्यंकभनं ब्वति काःपिं लखं लख नेवाः समुदायया अनुमोदनकासें थुगु लुमन्ति पौ न्ह्यब्वयागु जुल:

- संघीयता, लोकतान्त्रिक गणतन्त्र व धर्मनिरिपेक्ष राज्ययात न्हूगु संविधानपाखें संस्थागत यायेगु ज्या जुइमाः

- संविधान सभाया राज्य पुनसंरचना व राजनीतिक शक्ति बाँडफाँड समितिपाखें थःगु प्रारम्भिक अवधारणाय् प्रदेशत दयेकेगु मू लिधंसा म्हसीका व सामर्थ्य जुइ धकाः न्ह्यब्वःगु प्रस्ताव सैद्धान्तिक ल्याखं पायछि जूगु तर समितिपाखें प्रस्तावित यानातःगु नेवाः प्रदेशया सीमाङ्कन भौगोलिक लागा, जनसंख्याया घनत्व, प्राकृतिक श्रोत साधनया उपलब्धता कथं चीधं जूगु व नेपालमण्डलया पुलांगु ऐतिहासिक पक्षयात नं कःघायेगु ज्या मजूगुलिं थुकिया लागा तःकू यानाः स्वायत्तता, स्वशासन, आत्मनिर्णय व अग्राधिकार दुगु नेवाः स्वायत्त राज्य सुनिश्चित जुइमाः

- नेवाः स्वायत्त राज्य दुनेया फुक्क प्राकृतिक श्रोतय् नेवाःतय् अग्राधिकार सुनिश्चित जुइमाः

- नेवाः स्वायत्त राज्य दुने नेवाः पुर्खापिंसं नीस्वना थकूगु राष्ट्रिय अन्तरराष्ट्रिय सांस्कृतिक सम्पदाय् नेवाःतय्गु हे एकाधिकार जुइमाः

- नेवाःतय् न्हापांनिसें न्ह्यानाच्वंगु पराम्परागत संस्था व उमिगु न्याय प्रणाली (मानव अधिकारया मूल्य व मान्यता अःखः मजूगु) यात कानुनी मान्यता दयेमाः

- संघीय लोकतान्त्रिक गणतन्त्र नेपालय् केन्द्रीय सरकारय् छगू जक भाय्यात आधिकारिक भाय् कथं छ्यलेगु व नालेगु पाय्छि मखु, थुकी नेवाःतय् समर्थन मदु। बहुभाषिक देय्यात ल्वःकथं केन्द्रय् छगू सिबें उप्वः भाय्यात आधिकारिक भाय् कथं थाय् बीमाः

- राज्यपाखें राष्ट्रिय संवत् कथं मान्यता बीगु नेपाल संवत्यात न्हूगु संविधानय् उकथं हे थाय् बीमाः

- क्वःछिनातःगु ईया दुने हे संविधान च्वयेगु क्वचायेकाः राज्य पुनःसंरचना व शान्ति प्रक्रियायात पाय्छि जुइक पूवंकेमाः

- इलं मलाःगु वा मेगु गुगुं त्वहः चिनाः पित बीगु कथित 'संक्षिप्त संविधान' स्वीकार्य मजुइगु व आः पित बीगु संविधान पूर्ण संविधान हे जुइमाः

- सत्ता केन्द्रित आःया राजनीति यात दिकाः दलीय सहमति ब्वलंकेगु व संविधान च्वयेगुली मुक्कं शक्ति केन्द्रित जुइमाः ।

भलसा कयाच्वना, संविधान सभापाखें आः संविधान च्वयेगु इलय् सकल नेवाःतय् भावनायात कदर यासें च्वय न्ह्यथनागु सकतां खँयात संविधानय् दुथ्याकाः संवैधानिक रुपं सुनिश्चित यायेगु ज्या जुइ। अथे मजुसें, नेवाः भावना व चाहनाया अःखः गुगुं ज्या जुल धाःसा उज्वःगु संविधानयात नाला कायेत नेवाःत तयार मजुइगु व उकिया लिच्वः कथं प्रतिरोधय् सडक आन्दोलनय् तकं कुहां वयेत बाध्य जुइ धइगु खँ इलय् हे सचेत याकाच्वना ।

नेवाः स्वायत्त राज्य मंकाः संघर्ष समिति
११३१ पोहेलाथ्व ९,
नेवाः एकता दिवस ।

More Stories Like this