राष्ट्रिय ध्वाँय् यथावत
चुनावय् ब्वति काइगु फुक्कं हे दल राष्ट्रिय पार्टी
येँ (सन्ध्या टाइम्स)/ आःयागु हे नेपाःया राष्ट्रिय ध्वाँय्यात न्हूगु संविधानय् मान्यता बीगु खँय् स्वंगू तःधंगु दलया नेतातय् दथुइ सहमति जूगु दु ।
थौं सुथय् एकीकृत माओवादी, नेपाली कांग्रेस व एमाले नेतातय् दथुइ जूगु सहलहय् थ्व सहमति जूगु खः।
एकीकृत माओवादीं राष्ट्रिय ध्वाँय् हीकेमाः धकाः अडान तया वयाच्वंगु खःसा थौं जूगु स्वंगू दलया बैठकय् धाःसा माओवादी नेतात आःयागु हे राष्ट्रिय ध्वाँय्यात न्हूगु संविधानय् नं यथावत तयेगु खँय् सहमत जूगु खः ।
थौं सिंहदरवारय च्वंगु स्वंगू दलया बैठकय् आःया राष्ट्रिय ध्वाँय्या रंग व आकार प्रकारयात जनआन्दोलनं प्राप्त जूगु सफलतानाप स्वाकाः ब्याख्या यायेगु धकाः नं सहमति जूगु दु। राष्ट्रिय ध्वाँय्यात थौंकन्हय् धर्मलिसे स्वाकाः ब्याख्या यानातःगु व थ्व ध्वाँय् खास यानाः थीथी देगलय् जक दइगु जूगुलिं थुकिं धर्म व संस्कृतिया विभेद याइ धासें माओवादीं थुकिया विरोध याना वयाच्वंगु खः ।
उकथं हे बैठकं आवंलि आम निर्वाचनय् ब्वति काइगु फुक्क हे दलयात राष्ट्रिय दलया मान्यता बीगु खँय् नं सहमति जूगु दु ।
थ्व स्वयां न्ह्यः आम निर्वाचनय् ब्वति कयाः कूल ३ प्रतिशत मत हःगु दलयात जक राष्ट्रिय दलया मान्यता बीगु संवैधानिक व्यवस्था यानातःगु खः। तर आः अल्पसंख्यक नापं लिउने लानाच्वंगु जात जातिनाप स्वानाच्वंगु दलतय्सं नं निर्वाचनय् ब्वति काये फयेमा धकाः थ्व न्हूगु व्यवस्था यानागु खँ कांग्रेसया नेता रामचन्द्र पौडेलं संचारकर्मीतय्त कनादीगु दु ।
राष्ट्रिय दल जुइत ३ प्रतिशत मत माः धइगु थ्व प्रावधानयात नेमकिपां ताः इलंनिसें विरोध याना वयाच्वगु खः। स्वंगू दल दथुइ थौं जूगु सहमतियात कन्हय् जुइगु २८ दलय् बैठकय् पेश याइ तिनि ।
