अनमिन लिहां वनेधुंकाःया शान्ति प्रक्रिया

शान्ति प्रक्रियाय् वःगु माओवादी शक्तियात राजनीतिया मूलधारय् हयाः नेपालय् स्थायी शान्ति कायम यायेगु धकाः वःगु राष्ट्र संघीय मिशन अनमिन थःपिनि ज्या पूमवंकं हे लिहां वंगु दु। म्हिगः थःपिनि ध्वाँय् लिकयाः म्हिगः अनमिन लिहां वंगु खः। धायेत ला लिपा हानं आवश्यक जुल धाःसा अनमिन लिहां वयेफु धाःगु दु, तर नेपाःया यथास्थितिवादी राजनीतिक पार्टीया मनस्थिति स्वयेबलय् थुमिसं अनमिनयात हानं लित सःती धइगु खँय् धाःसा शंका हे दु ।

थौं अनमिन गुगु अवस्थाय् लिहां वनाच्वन, थ्व नेपाःया अतिकं जटिल अवस्था खः। देशय् कामचलाउ सरकार चले जुयाच्वंगु दु, न्हूम्ह प्रधानमन्त्री ल्ययेगु ज्याय् दलतय् दथुइ तःधंगु हे खिंचातानी जुयाच्वंगु दनि, न्हूगु संविधान वइगु खः लाकि मखु धइगु खँय् हे जनतायात शंका जुया वयाच्वंगु दु, यदि संविधान मवल धाःसा मेगु कथंया आन्दोलन याये धकाः मधेशी व जनजाति संगठनत तयार जुयाः च्वनाच्वंगु दु। थज्याःगु जटिल व संगीन अवस्थाय् अनमिन लिहां वनाच्वंगु दु। नेपाःया राजनीतिक पार्टीतय्सं देशय् ब्वलनाच्वंगु समस्या समाधान यायेत सुपः छपु तक संके मफयाच्वंगु इलय् छगू अभिभावकीय निकाय जुयाः नेपालय् च्वनाच्वंगु राष्ट्र संघया युनिट अनमिन लिहां वंगु धइगु निश्चय नं जनताया नुगलय् ख्वाउँ दुहां वनीगु विषय खः। खतुं अनमिन वंसां माओवादी लडाकुया व्यवस्थापन व शान्ति प्रक्रियायात गुकथं न्ह्याकेगु धइगु खँय् दलतय् दथुइ सहमति ला जूगु दु, तर दलतय्सं उगु सहमतियात इमान्दारीपूर्वक पालना याइ व शान्ति प्रक्रियायात सफल याइ धइगु खँय् शंका धाःसा प्रशस्त हे दनि ।

More Stories Like this