बुंगद्यःया सिबः न्हंकेगु ग्वसाः?

तारण शाक्य

यल तःबहाःया बुंगद्यःया सिबः न्हंकेगु ग्वसालय् भाजु बुद्धाचार्य शाक्यजुं आपालं म्हय् मन्ह्यंक धन्दापीर कया जूगु खँ 'सन्ध्या टाइम्स' पत्रिकाय् व्यक्त च्वसुं बय्बय् जुइक भुछ्याः थाना जूगुलिं सी दत। न्यकू जात्रा मतयाः व्यवस्था समिति व करुणामय मृदङ भजन खलः सामाजिक व धार्मिक संख्या खयां नं यल नेवाः समाजया ऐतिहासिकता संस्कृतियात निरन्तरता बियाः विकृतियात चीकाः प्रगतिया मार्गय् न्ह्यज्यानाः स्वनिगलय् हे यलया प्रतिष्ठा न्ह्यब्वया वयाच्वंगु संस्था खः। इलय् ब्यलय् थीथी अर्थया पंगःत वयाः सुसाःकुसाः याना तये थाकुगु सामाजिक परम्परागत संस्थाय् थःगु हे कथंया बाखंत दइगु जुयाच्वन। थ्व खँ सम्पर्कय् लाःपिंसं हे जक थुइ, मेपिंसं थुइके अःपु मजू ।

न्यकू जात्राया जातः प्वला स्वत धाःसा बुद्धकालीन घटना धाइगु न्यने दु। अथे नं मतयाःया इतिहास स्वल धाःसा च्यासःदँ न्हापा जुजु बालार्चन देवं दाजु वृषदेवया पुण्य स्मृतिइ यलया जेष्ठवर्ण महाविहारय् नीस्वनाः मतयाः न्यायेका वंगु वंशावलीइ स्वयेदु। अथे हे न्यकू जात्रा मतयाः पर्वयात जुजु गुणकाम देवं छगू हे याना थकूगु खः। अथे हे जुजु सिद्धि नर्सिंह मल्लं यलया नां दंगु झिगू त्वाःयात पालंपाः दँय्दसं न्यकू जात्रा मतयाः पर्व न्ह्यज्याका वनेगु कथं छगू त्वालं मेगु त्वाःयात पाः लःल्हायेगु व्यवस्था याना थकल। पंगः (विकृति) वइगु इलय् "जि वयेत्यना" धकाः न्यना वइगु मखु। अथे जुयाः इलय् ब्यलय् थ्व पर्वय् हिउपाः वयाच्वंगु खनेदु। आः झीगु इलय् थ्व पर्वय् संकट ब्वलन। अथे जुयाः त्वाःया बुद्धिजीवीत जानाः थ्व पर्वयात न्हंका तंका छ्वये मजिउ धकाः न्यकू जात्रा मतयाः व्यवस्था समितिया नामं संस्था नीस्वनाः २०५२ सालं सरकारय् दर्ता नं याःगु जुल। थ्व संस्थायात तिबः बीत यलया नांजाःपिं मदुम्ह पं. हेमराज शाक्य, नेपालभाषा एकेडेमिया चान्सलर सत्यमोहन जोशी, बौद्ध विद्वान लोक बहादुर शाक्य, दुम्ह गुरु धर्मरत्न त्रिशुली, समाजसेवी बुद्धिराज वज्राचार्य आदि थेंज्याःपिं थीथी ख्यःया शिरोमणि जुयाच्वंपिनिगु संरक्षण, संवर्द्धन व सुरक्षाया कुसाय् च्वनाः ब्वलनाच्वंगु न्यकू जात्रा मतयाः व्यवस्था समितिं आपालं च्वछायेबहःगु ज्याझ्वः न्ह्याकाः पाःलाःगु त्वाःयात थीथी कथं ग्वाहालि याना वयाच्वंगु सकसिनं सिउगु हे खँ जुल ।

संस्था नीस्वने धुनेव न्हापालाक्क संस्थाया थायबाय्यागु हे चिउताः जुइगु खः। इलय् व्यलय् थीथी कथंया ज्याझ्वःत न्ह्याके मालीगु, बराबर सहलह ब्याके मालीगु नव बाजाया झिंखुगू कथंया बाजं तयेगु थासय् व्यवस्था, बाजा-गाजा स्यनेगु थाय्या व्यवस्था आदि आदि मदिक्क वइगु समस्या ज्यंकेगु कुतः यायां तःबहाःया फल्चा, पाःताः जुयाः फोहोर वांछ्वये हइगु थाय् जुयाच्वंगु व सतः दयेकाः मेपिंसं मोज यानाच्वंगु थासय् मिखा वंकल। हाःनाः मदयाः पाःताः जुयाः सकसिनं फोहोर वांछ्वइगु अशोभनीय दुर्गन्धित जुयाच्वंगु फल्चाया न्हापा थें हे पुलांगु पहः वयेक नेवाः कलाकृतिं जायेकाः नेवाः संस्कृति कथं नेवाः सम्पदा फल्चायात जीवन्त याइगु फल्चा, सतःया थां, झ्याः आदि ऐतिहासिकता पिज्वयेक नेवाः कलाकृतिं छाय्पियाः पुनःनिर्माण यायेगु कुतः न्यकू जात्रा मतयाः व्यवस्था समिति व करुणामयया मृदङ भजन खलः अले तःबहाः त्वाःया बासीपिंसं मिले जुयाः यल सम्पदा
संरक्षण समितिया अध्यक्ष समाजसेवी बुद्धिराज बज्राचार्यया ग्वाहालिं आर्थिक व्यवस्था चूलाकाः पुनःनिर्माण यायेगु कुतः जुल।ज्याझ्वः नं न्ह्याकल। अथे पाःताः जुयाः दुर्गन्धित जुयाः त्वाःयात हे शोभा मदयाच्वंगु न्हना वंगु सतः व फल्चायात पुनः जीवन बियाः न्हापा थें फल्चा, सतः निर्माण याना बीत्यंगुयात "बुंगद्यःया सिबः न्हंकीगु ग्वसाः" जुइन धकाः प्रमुख निकायतय्त थनाः भग्नावशेष, नवःगु थाय्यात यथावत हे याना तयेमाल। इमित ज्या याके बी मजिल धकाः इतःमतः कनाः हाला सना जुइगु धइगु गन तक ठीक खः?

न्हना, तना वनाच्वंगु भग्नावशेष फल्चा न्ह्याम्हेसिगु जूसां नं सार्वजनिक कथं दयाच्वंगु सम्पदायात पुनः जीवन प्रदान यायेत्यंगु जक खः। न्यकू जात्रा मतयाः व्यवस्था समिति व मृदङ भजन खलकं थःगु नामय् यानाः कायेत्यंगु मखु। इमिगु नामय् दर्ता जुइमाः धकाः गनं नं दर्ता याःगु वा दावी याःगु नं खने मदु। पुरातत्व विभाग व नगरपालिकां रोक लगे याःगु नं खः। तर साबिक फल्चा, सतः पुनःनिर्माण जुइगु जुसेंलि ऐतिहासिक सम्पदा भग्नावशेष जुयाः फोहोर वांछ्वयेगु थाय्यात ऐतिहासिक सम्पदा संरक्षण संवर्द्धन व सुरक्षा यायेत्यंगुयात "बुंगद्यःया सिबः न्हंकीगु ग्वसाः" धकाः पत्रिकाय् पिकयाः विरोध यायेगु गन तक ठीक खः?

पुलांगु भग्नावशेष फल्चा पुनःनिर्माण याइन धकाः धन्दा पीर काःगु खःसा सम्बन्धित संस्था नाप छक्वः स्वापू तयाः न्यनेकने याःगु जूसा म्वाःसां म्वाःसां पीर काये माली मखु जुइ। यलया नांदंगु संस्थातय्त बांमलाक खँ ल्हानाः वय्कःयात छु लबः दत? भिंगु ज्या याइपिंत उत्साह व प्रोत्साहन बियाः ग्वाहालि यायेमाःथाय् झन क्वथुना जुइगु बांलाःगु ज्या मताल। अथे जूगुलिं सम्बन्धित संस्थानाप सहलह ब्याकाः पुलांगु सतःयागु तस्बीर आः दयेकेत्यंगु नक्सा आदि स्वयाः सन्तुष्ट जुयादीत इनाप याये।
धाइपिनि धयां गाः, च्वइपिनि च्वयां गाः। सेवाया भावनां समाजसेवाया ज्या याइपिनि साप हे थाकु। धन्दा कयाः ज्या नं याये मानि, अपजस नं फये मानि। निःस्वार्थ भावनां न्हना वंगु इतिहासया पुननिर्माण यायेगु तःधंगु पुण्य खः ।

More Stories Like this