झिदँय् क्यन विकिपिडिया - नेपालभाषा द. एशियाय् दक्कले न्ह्यःने

नेपालभाषा विकिपिडिया दक्षिण एशियाय् दक्कले न्ह्यःने

इन्टरनेट विश्वकोश विकिपिडिया थौं गुदँ फुनाः झिदँय् क्यंगु दु । थुकिया लसताय् थुकिया संस्थापक जिम्मी वेल्स व वया पुचलं लण्डनय् विकिपिडियाया बुदिं हन सा विश्वन्यंक ४४४ गू ज्याझ्वःया दथुइ विकिपिडिया बुदिं हनाच्वंगु दु ।

निःशुल्क विश्वकोश विकिपिडियाय् आःतकया च्वसु संख्या एक करोड सत्तरी लाख थ्यंगु दुसा अंग्रेजी भाषाय् जक थ्व संख्या पैंतिस लाख थ्यंगु दु । थौंकन्हय् थुगु वेबसाइट विश्वन्यंक दक्कले अप्वः स्वइगु साइटया सूचीइ न्यागूगु थासय् लाः ।

ज्यानुवरि २००१ य् जिम्मी वेल्स व ल्यारी स्याङ्गरं स्थापना याःगु विकिपिडिया विश्व न्यंकया स्वयमसेवी च्वमिपिंपाखें तयार जुयाच्वंगु विश्वकोश खः । विश्वन्यंकया २७६ भाषाय् उपलव्ध थुगु कोश विज्ञापन रहित व नाफा रहित कथं न्ह्यानाच्वंगु दु ।

नेपालय् विकिपिडिया बुदिं
यलया पुल्चोक ईञ्जिनियरिङ क्याम्पसय् छगू ज्याझ्वः दथुइ विकिपिडियाया झिक्वःगु बुदिं हन । ज्याझ्वःया उद्घाटन नेपाल प्रज्ञा प्रतिष्ठानका प्राज्ञ सुलोचना मानन्धरं यानादीगु खः ।

ज्याझ्वलय् प्राज्ञ तुलसी दिवस, नेपाली विकिपिडियाया इन्दिवर बडाल, गणेश पौडेल, सञ्चारकर्मी केदार शर्मा आदिपिन्सं थःगु बिचाः प्वंकादीगु खः ।

विकिपिडिया नेपालभाषाय्
नेपालभाषाया विकिपिडिया दक्षिण एशियाय् हे दक्कले न्ह्यःने दु । दक्षिण एशियाया भाषात मध्यय् दक्कले अप्वः च्वसु दुथ्याःगु नेपालभाषाय् खः । आःतकया तथ्यांक कथं नेपालभाषाय् ६९,५५७ च्वसु दु । थुकिया तुलनाय् हिन्दी भाषाय् ६७,१७३ च्वसु व खस भाषाय् ११,००१ जक च्वसु दु ।

More Stories Like this