मथुरायात गंकी व प्रेमध्वजयात सिर्जना सिरपा

थुगु दँया 'गंकी धुस्वां वसुन्धारा सिरपा' नेपालभाषाया उपन्यासकार मथुरा साय्मि व 'धुस्वां साय्मि सिर्जना सिरपा' वरिष्ठ गायक नापं संगीतकार प्रेमध्वज प्रधानया लःल्हाःगु दु

गंकी धुस्वां वसुन्धारा प्रतिष्ठानं थौं येँय् याःगु ज्याझ्वलय् एनेकपा (माओवादी)या नायः नापं ज्याझ्वःया मूपाहाँ पुष्पकमल दाहाल 'प्रचण्डं' उपन्यासकार साय्मि व गायक प्रधानयात उगु सिरपा लःल्हानादीगु खः ।

कतांमरी, ज्वाला, यां मिख, माकूगु विष लगायत नांजाःगु उपन्यास च्वयादीम्ह साय्मि व राजामतिकुमति, उपहार थ्व मतिनाया, न मान लाज, गोरेटो त्यो गाँयको लगायत ७०० स्वयां अप्व म्ये हालादीम्ह प्रधानयात ज्याझ्वलय् सम्मानपौ नापं म्होतिं नीद्वः तकाः नं लःल्हाःगु खः ।

प्रतिष्ठानया नायः अरुण साय्मिया सभापतित्वय् जूगु ज्याझ्वलय् मूपाहाँ माओवादी नायः प्रचण्डं साहित्यं समाजयात मापन याइगु धासें थुकीं समाजयात दिर्घकालीन लिच्वः लिकीगु धयादिल ।

अथेहे सिरपा त्याकादीम्ह साय्मिं वरिष्ठ साहित्यकार प्रमेबहादु कसाः नं थःत साहित्यय् वयेत प्रेरण ब्यूगु धासें उपन्यास च्वयेगु प्रेरण धाःसा थःम्हं धुस्वां साय्मि पाखें प्राप्त यानागु धयादिल ।

ज्याझ्वलय् माओवादी नायः प्रचण्डं उपन्यासकार अरुण साय्मिया च्वसु मुना सफु 'दरवार हत्यकाण्ड देखी जनविद्रोह' सम्म व नेपालभाषाया उपन्यास 'हाकुतां'या पुनःप्रकाशन जूगु सफुया उलेज्या यानादीगु खः ।

More Stories Like this