सेना व ल्वाभः अनुगमनय् सहमति

थौं अनमिनया ध्वाँय् लिकायेगु ज्याझ्वः

येँ (सन्ध्या टाइम्स)/वर्तमान सरकार व एकीकृत माओवादी दथुइ राष्ट्रसंघीय मिसन अनमिन वनेधुंकाः सेना व ल्वाभःया अनुगमन याइगु संयन्त्र दयेकेगु बारे सहमति जूगु दु ।

माओवादी लडाकुया रेखदेख, समायोजन व पुनःस्थापना सम्बन्धी विशेष समितिइ प्रतिनिधित्व याइगु स्वंगू दलया छम्ह छम्ह यानाः स्वम्ह नापं सचिवालयया स्वम्ह यानाः खुम्हेसिया समितिं दयेकाः ल्वाभः अनुगमनया नेतृत्व यायेगु खँय् सहमति जूगु खँ उच्च स्रोतं धाःगु दु। प्रधानमन्त्री माधव नेपाल व माओवादीया अध्यक्ष प्रचण्ड नापं मेमेपिं नेतातय् दथुइ थौं उगु सहमति जूगु खः ।

अनमिनं याना वयाच्वंगु ज्याया जिम्मेवारी कायेगु संयन्त्र निर्माण यायेत जूगु उगु सहमति लगायतया पौ थौं सनिलय् जुइगु अनमिनया 'फ्ल्याग डाउन सेरेमोनी' ज्याझ्वः न्ह्यः हे अनमिनयात बीगु सहमति नं जूगु दु।
विशेष समितिं कार्यादेशय् मलाःगु विषययात नं समिति व सचिवालय यानाः खुम्हेसिया समितिइ सहलह यानाः सहमति यायेगु खँ जूगु खः। उगु समितिं स्थानीय तहलय् अनुगमनया निंतिं छु गज्वःगु संयन्त्र दयेकेगु धकाः निर्णय यासें ब्यागलं कथंया जनशक्तिया भर्ना प्रक्रिया नं न्ह्याकी धाःगु दु। समितिं अनमिनया अनुपस्थितिइ अन्तरिम संविधान, शान्ति सम्झौता नापं संशोधनया खाका तकं तयार यानाः सुझाव बी ।

उगु बैठकय् राष्ट्रसंघीय मिसन अनमिन लिहां वनेधुंकाः नं देशय् न्ह्यानाच्वंगु शान्ति प्रक्रियायात निरन्तरता बीगु सहमति जूगु दु। नेतातय् दथुइ बृहत शान्ति सम्झौता, अन्तरिम संविधान व सेना नापं ल्वाभः अनुगमन सम्बन्धी सम्झौता यथावत हे तयाः न्ह्याः वनेगु सहमति जूगु दु ।

माओवादी लडाकु व ल्वाभःया भाला विशेष समितियात बीगु जूगु दु। विशेष समितिया नं दुजः जुयादीम्ह माओवादी नेता बर्षमान पुनं थौं सहलह लिपा धयादिल, 'अनमिन वनेधुंकाः लडाकु व ल्वाभःया भाला जिमिसं कायेगु जुइ ।'

वय्कलं माओवादी लडाकुया ७ गू थाय् व नेपाली सेनाया छगू थासय् भण्डारण यानातःगु ल्वाभः अनुगमन संयन्त्रया सहमति लिक्क थ्यंगु जानकारी नं बियादिल।
सहलह लिपा माओवादी अध्यक्ष प्रचण्डं सहमति लिक्क थ्यन धकाः प्रतिक्रिया बियादीगु खः ।