नेवाः एकता अझ धिसिलानाच्वंगुया चिं

स्वायत्त राज्य पलिस्थाया नारा ज्वनाः न्ह्यानाच्वंगु नेवाः आन्दोलनयात अझ छपलाः न्ह्यःने यंकेगु ल्याखं म्हिगः नेवाः एकता दिवस हनेगु ज्या जुल। खास यानाः यलया नेवाः कार्यकर्तातय्गु पहलय् यलय् हे जूगु उगु ज्याझ्वलय् आपालं नेवाःतय्सं ब्वति कयाः ग्वसाःयात ताःलाका बिउगु दु। उकिया लागिं मू ग्वसाः खलः नेवाः स्वायत्त राज्य मंकाः संघर्ष समिति व स्थानीय ग्वसाः खलः ज्यापु समाज यलयात नं सुभाय् बीमाः ।

थ्व स्वयां न्ह्यः येँय् जूगु नेवाः स्वायत्त राज्य घोषणा व वयां लिपा ख्वपय् जूगु नेवाः राष्ट्रिय राजनीतिक सम्मेलन लिपा यलय् म्हिगः नेवाः एकता दिवसया तःजिगु ज्याझ्वः जूगु खः। थुकिं यानाः नेवाःतय् शक्तियात अझ क्वातुका बीगु जक मखु राज्ययात क्वातुया वंगु नेवाः शक्ति ब्वयेगु अवसर नं चूलाःगु दु। नेवाःतय्सं क्यंगु थ्व एकताया शक्तिं देय्या मेमेपिं जनजातितय्त नं उत्साहित याइगु निश्चित खः। लिसें थ्व राज्ययात नेवाःतय्सं बिउगु छगू कथंया चेतावन नं खः। नेवाःतय् दथुइ कायम जुया वयाच्वंगु एकता स्वयम् हे छगू सन्देश खः। थुकी अप्वः ब्याख्या आवश्यक मजू। नेवाःतय् दथुइ कायम जुयाच्वंगु राजनीतिक विभेदयात मंकाः संघर्ष समितिया गतिविधिं म्हो याना यंकाच्वंगु दुसा आः नेवाःतय् दुगु राज्यं हे क्वचिंगु कारणं जक दयाच्वंगु सामाजिक, सांस्कृतिक विभेदयात नं थुकिं मदयेका यंका बीगु निश्चित दु। नेवाःतय् दथुया थ्व एकता थौं नेवाः स्वायत्त राज्य प्राप्तीया आन्दोलनय् जक मखु कन्हय् राज्य प्राप्त जुइधुंकाः उकियात सुथांलाक न्ह्याकेगु लागिं नं उतिकं आवश्यक जू। थ्व एकता छगू सफल नेवाः राज्य पलिस्थाया ई तक हे कायम याना तयेमाः ।

More Stories Like this