यलय् नेवाः एकता दिवस हन

यल (सन्ध्या टाइम्स)/थगुने जूगु नेवाः स्वायत्त राज्य घोषणाया लुमंति कथं थौं यलया पूच्वय् छगू तःजिगु ज्याझ्वः यासें नेवाः एकता दिवस न्यायेकल। पूच्वया दुवातय् तुं दबू ग्वयाः याःगु उगु ज्याझ्वलय् स्वनिगःया द्वलंद्वः नेवाःतय्सं ब्वति कयाच्वंगु दु ।

ज्याझ्वलय् ज्याझ्वः व्यवस्थापन समितिया कजि लिसें ज्यापु समाज यलया छ्यांज्ये प्रेम महर्जनं बोडेय् जूगु नेवाः राजनीतिक सम्मेलनया घोषणापत्रय् प्रतिवद्धता प्वंकेत तयादीगु प्रस्तावयात अनुमोदन याःगु खः। उगु हे ज्याझ्वलय् संस्कृतिविद् सत्यमोहन जोशीं 'पाचिना' नांगु लय्पौ व बोडेय् जूगु राजनैतिक सम्मेलनया सीडी विमोचन यानादीगु खः। ज्याझ्वः शुरु जुइ न्ह्यः सांस्कृतिक ज्याझ्वः नं जूगु खः। ज्याझ्वः नेवाः स्वायत्त राज्य मंकाः संघर्ष समितिया वर्तमान नायः सानुराजा शाक्यया सभापतित्वय् जूगु खः। ज्याझ्वः शुरु जुइ न्ह्यः नेपाःया राष्ट्रिय गान व नेवाः राष्ट्रिय म्येँ हालेगु लिसें थीथी सहिदपिनि लुमंतिइ मौन धारणया ज्या नं जूगु खः ।

थुलि ज्याझ्वः जुइवं अनं तुं जुलुस पिकासें यल देय् चाःहिउगु खः।जुलुसं बुंगद्यः चाःहिलीगु रुट चाःहिलाः हानं पूच्वय् तुं थ्यंकाः ल्यं दुगु ज्याझ्वः याइगु ग्वसाः दु ।

थौंया ज्याझ्वलय् संघर्ष समितिया थीथी घटकया नायःत मध्ये नरेन्द्रभक्त हाडां इलं हाःगु प्रस्ताव न्ह्यब्वइगु ग्वसाः दुसा सुजीव वज्राचार्यं हस्तक्षेपकारी ज्याझ्वःया प्रस्ताव, नेमसिं नकःमिं बोडे घोषणाया प्रस्ताव, नरेशवीर शाक्यं लुमंका पौ न्ह्यब्वइगु ज्याझ्वः दु। अथे संघर्ष समिति सचिवालयया छ्यांज्ये मल्ल के. सुन्दरं नेवाः एकता दिवसया आज्जु न्ह्यब्वयादीसा सल्लाहकार प्रेमशान्ति तुलाधरपाखें भिंतुना व बाबुराजा वज्राचार्य व राजभाई जकःमिपाखें सुभाय् देछायेगु ज्याझ्वः जुइ ।