न्हूगु मोडय् थ्यंगु प्रधानमन्त्री चुनाव

देशय् अन्यौलपूर्ण न्ह्यानाच्वंगु प्रधानमन्त्री ल्ययेगु चुनाव आः न्हूगु मोडय् प्रवेश जूगु दु। नेपाली कांग्रेसया याकःचा उम्मेदवार रामचन्द्र पौडेलं थःपिनि उम्मेदवारी लित कायेवं आः चुनावया मैदान खाली जूगु दुसा प्रधानमन्त्री ल्ययेगु प्रक्रिया मेगु मोडय् प्रवेश जूगु खः। थुकिं यानाः न्हूम्ह प्रधानमन्त्री ल्ययेगु लागिं न्हूगु हे प्रक्रियाय् वनेमाःगु आवश्यक जूगु दु। तर प्रधानमन्त्री ल्ययेगु न्हूगु प्रक्रिया छु जुइ धइगु खँ धाःसा अझं स्पष्ट जूगु मदुनि।
तर न्हूम्ह प्रधानमन्त्री ल्ययेगु लागिं आः छु प्रक्रियाय् वनेगु धइगु खँय् धाःसा हानं मेगु विवाद ब्वलनीगु स्थिति पिहां वःगु दु। प्रधानमन्त्री ल्ययेगु प्रक्रिया बारे थीथी कथंया मोडेलत न्ह्यःने वयाच्वंगु दु। आः संसदं प्रधानमन्त्री ल्ययेगु सिबें चक्रीय प्रणालीपाखें प्रधानमन्त्री ल्ययेगु खः लाकि धइगु चर्चा नं वयाच्वंगु दु। तर चक्रीय प्रणालीइ वनेगु खःसां न्हापांम्ह प्रधानमन्त्री सु जुइ धइगु खँय् धाःसा विवाद पिहां वयाच्वंगु दु। चक्रीय प्रणालीपाखें न्हापांम्ह प्रधानमन्त्री सु जुइ धइगु खँय् विवाद दु। स्वंगू तःधंगु पार्टतय्सं प्रधानमन्त्री जुइगु न्हापांगु पाः थःपिंत हे बीमाः धकाः माग यानाच्वंगु दु। थुकिं यानाः चक्रीय प्रणालीपाखें नं प्रधानमन्त्री ल्ययेगु ज्या मजुइ थें खने दयाच्वंगु दु। अतः आः न्हूगु प्रणालीइ वनेबलय् गज्याःगु प्रणाली ज्वनेगु धइगु विवाद वइगु निश्चित दु। थ्व न्हूगु विवादं हानं छक्वः देशय् अन्यौलता ब्वलनाः संविधान व शान्ति प्रक्रियायात लिउने घ्वाना बीगु अवस्था वःगु दु। उकिं थ्व इलय् राजनीतिक दलतय्सं पदया लोभ मयासे उदारतापूर्वक देशय् ब्वलनाच्वंगु अन्यौलता चीकेगु लागिं पहल यायेमाःगु आवश्यकता न्ह्यःने वःगु दु।

More Stories Like this